BHARATPUR, NEPAL (AFP).- Por lo ménos 63 persona a desaparesé den sentro di Nepal despues ku área grandi di tera a lòs provoká pa áwaseru i a lastra dos bùs bai tira den un riu. Algun desena di trahadónan di reskate a buska den e zona pa mira si ta haña sobrebibiente, pero mester a stòp ku esaki na momento ku nochi a sera.
“Ta anochi kaba i ta imposibel pa sigui ku e operashon”, segun Kumar Neupane, bosero di polis di Nepal. “Lo sigui buska mañan mainta”.
E funshonario lokal Khimananda Bhusal a informá ku e dos bùsnan tabata transportá den kareda di 66 pasahero, di kua tres por a sali promé ku e vehíkulonan a kai den riu Trishuli. Nan a keda transportá pa hòspital.
Un di esnan ku a sobrebibí a relatá na AFP for di su kama di hòspital ku su dos yunan i dos ñetu tabata den un dje bùsnan ku a kai den awa. “Mi yunan, mi ñetunan a bai… ami so a keda”, segun Jugeshwor Ray Yadav, di 45 aña. “M’a guli awa, pero mi por a landa i despues m’a tene na un rama”. E aksidente a tuma lugá riba e ruta entre Narayanghat-Mugling, komo 100 kilometer wèst dje kapital, Katmandú.
Aksidentenan mortal di tráfiko ta algu normal na e pais aki di Himalaya pa motibu di mal kondishon di kaminda, mantenshon pober di vehíkulonan i korementu pa loko.
Segun sifranan di gobièrnu, den e 12 lunanan anterior te ku aprel último den kareda di 2.400 persona a muri riba kareteranan.
