WILLEMSTAD.- E asosashon di importadónan, (BVCA) ta ansioso pa sera konosí ku e minister nobo enkargá ku Desaroyo Ekonómiko, Roderick Middelhof i pa interkambiá di idea kuné riba su vishon ekonómiko, inkluso e makutu básiko. BVCA no ta kere ku makutu básiko ta e instrumento adekuá pa aliviá komunidat di preis haltu.
Segun presidente di BVCA, Robbin Martina, a splika durante e ‘podcast’ “3’or ku Gino” riba plataforma digital di EXTRA, tin diferente otro manera ku e asosashon a yega di trese dilanti na diferente okashon pa yega na alivio di preisnan haltu di komestibel. E presidente ta bisa ku makutu básiko ta un medida general ku tantu esun ku tin un bon entrada komo esun ku tin un entrada mas abou ta probechá di dje. “BVCA ta pro un sistema kaminda e skoudernan mas hanchu ta karga mas miéntras ku ta yuda e grupo ku gobièrnu realmente ke yuda.
Eks minister di Desaroyo Ekonómiko, Ruisandro Cijntje, a bisa den reunion di parlamento na yüni 2024 ku e ta aserká e problemátika di inflashon di forma integral pa asina wak pa kontrarestá oumento di kosto di bida ku tin efekto negativo riba forsa di kompra di prinsipalmente esnan mas vulnerabel den komunidat. Tabata un kontinuashon di e reunion públiko suspendé for di 8 di yanüari riba oumento astronómiko di preis di kombustibel.
El a bisa ku e tambe a tuma nota di oumento di preis. “E subida ta un trènt struktural. Abase di sifra di CBS, den e último 53 añanan a konosé oumento di preis. Ta na aña 2015 so tabatin un deflashon.”
Último 5 añanan tambe tabatin oumento di kosto di bida. Na 2022 preisnan a subi ku 7,4 porshento. Na 2023 e subida tabata ménos, esta di 3,5 porshento. Kòrsou komo pais chikí sin rekurso natural ta dependé pa mas ku 80 porshento di importashon i ta dependé di kiko ta tuma lugá na nivel internashonal, segun Cijntje a splika.
Entretantu Cijntje no ta minister mas despues ku MFK na fin di ougùstùs 2024 a saka PNP for di gobièrnu. Den parlamento el a indiká ku inisiativa i medidanan konkreto den e maneho ku e ta hiba pa mitigá oumento di preis ta introdukshon di e aplikashon “Mi Pòtmòni” kaminda e konsumidó por kompará preis loke ta stimulá kompetensia. Tambe tabata trahando riba introdukshon di e ‘makutu básiko smart card’ pa duna deskuento riba komestibel i produktonan di primera nesesidat na personanan di ménos rekurso.
Na sèptèmber 2023 a introdusí alabes un tarifa spesial pa awa pa kunukeronan ku meta pa planta i produsí produktonan di alimentashon mas kompetitivo. Pa garantisá seguridat di alimentashon Cijntje a bisa ku ta bai traha riba introdukshon di awa gris pa plantashon. Tambe tin proyekto di kultivashon den ‘e-zone’ ku ta enserá un akuerdo tentativo entre MEO i Curinde pa hasi uso di instalashon i terenonan di Curinde na preis atraktivo, tantu na Hato komo na Nieuwe Haven.
Mas aleu MEO huntu ku otro ministerionan ta sondia e posibilidat pa haña mas tereno pa agrikultura. Otro proyekto ku e minister a bisa di ta trahando riba dje ta kultivo di tuna den nos awanan. Ta trata aki di produkshon di tuna tantu pa konsumo lokal komo pa eksportashon. Tur esakinan den e afan pa redusí preis i alsa seguridat di kuminda.
Foto:
Roderick Middelhof
