SIHANOUKVILLE, COMBODJA, AP.- E kadaver di 17 obrero a wòrdu rekuperá i 24 persona heridáa a wòrdu reskatá entre ruina di un edifisio di shete nivel ku a kolèps na Cambodja, miéntras outoridat ta interogá kuater personal di nashonalidat chines involukrá den e proyekto di konstrukshon di e edifisio.
Trahadónan a indiká ku e edifisio den siudat Sihanoukville a fungi komo nan alohamentu.
“Tur trahadó tabata drumi. E edifisio a kuminsá vibra i a kolèps despues. Pero esaki a sosodé demasiado rápido i no tabatin tempu pa skapa”, segun indikashon.
Ministerio di Trabou i Kapasitashon Vokashonal a bisa ku 30 trahadó tabata na e sitio na momentu ku e edifisio a kolèps, pero tabatin entre 55 i 60 persona den e edifisio.
Yun Min, gobernador di provinsia Preah Sihanouk a informá ku e edifisio tabata propiedat di un invershonista chines ku e kumpra e tereno pa konstruí su kondominio, un di e mayoria proyektonan chines den e sentro turístiko aki.
Outoridat provinsial a indiká den un komunikado ku kuater chines asosiá ku e konstrukshon a wòrdu detené i ku a start un investigashon di e insidente aki.
