Bista aéreo dje skol sekundario den e siudat kanades, Tumbler Ridge, kaminda ku e matansa a tuma lugá.
MONTREAL (AFP).- Canada ta di luto, segun e promé minister Mark Carney a bisa ayera, referiendo na e nuebe mortonan i 27 persona heridá den un tiroteo den un skol sekundario i un kas di famia. Ta trata di un dje masakrenan di mas grave registrá den e pais akí.
E atake a tuma lugá den Tumber Ridge, un pueblo di 2.300 abitante den e provinsia Britain Columbia. Ta sospechá ku e atake a keda realisá pa “un muhé kabei blònt”, segun un deskripshon di polis, kende a topa ku e kurpa di esun ku nan ta sospechá. Di e 27 heridonan, dos ta den kondishon grave.
Carney a bisa di ta “kibrá” pa e “aktonan hororoso di violensia” i a kanselá un biahe ku e mester a hasi pa Alemania relashoná ku un konferensia riba seguridat.
Polis a haña seis persona morto den e skol, miéntras ku un di shete a muri den ambulans. Otro dos restu mortal a aparesé den un kas, ku segun polis “tin relashon ku e insidente”. Ta trata di mama i un ruman dje sospechoso.
Darian Quist, un studiante dje instituto, a komentá na e emisora CBS ku e tabata den klas ora ku nan a tende e tirunan. Na un promé instante nan no tabata sa ku ta algu grave, te ora ku a drenta potrètnan “teribel” dje matansa. “Nos a blòkia e portanan ku mesa durante mas ku dos ora”, segun el a bisa mas aleu.
Ta e di dos matansa registrá den British Columbia den ménos ku un aña. Den aprel di 2024, un hòmber a mata diesun persona den Vancouver drentando ku su vehíkulo den un multitut ku tabata selebrá un festival kultural filipino.
