WILLEMSTAD.- Ku otro logro importante, Curaçao Airport Partners (CAP) a lansá e inisiativa di mas grandi di kontratashon te awor, ku tin komo meta yena mas ku 100 posishon pa fin di aña. E enfoke ta riba funshon operashonal esensial ku ta fundamental pa siguridat i kalidat di servisio di aeropuerto, inkluyendo; polis di aeropuerto, ofisial di ‘screening’, bomberonan, shofùr di bùs riba ‘apron’ (riba pista), agentenan di parkeo, i otro ròlnan di sosten vital.
Te awor, CAP a logra yena e promé grupo di vakaturanan i ta spera di dòbel e kantidat akí den siman ku ta bin. Seshonnan ta tuma lugá dos biaha pa luna, pa sigurá ku miembronan nobo di ekipo ta integrá den un manera suave i efisiente.
E esfuerso akí ta sigui sin stòp, ku reklutashon di forma intensivo ku ta kontinuá durante òktober i e lunanan ku ta sigui. Aunke no ta tur posishon a yena ainda, e meta prinsipal di CAP ta pa logra kontratá e total di hende ku ta nesesario mas lihé posibel.
Komo parti di su kompromiso den área di ESG (Ambiental, Sosial i maneho), CAP ta duna prioridat na kontratashon pa fortalesé su forsa laboral, sostené desaroyo ekonómiko i sosial di komunidat, i drecha un konekshon mas fuerte entre aeropuerto i esnan ku e ta sirbi.
Banda di e reklutamentu eksterno, CAP a kompletá vários promoshon interno, demostrando asina su kompromiso ku desaroyo di su propio personal i ku krea oportunidat pa karera. E inisiativanan akí ta parti di e strategia mas amplio di CAP pa integrá funshon krítiko den kas i pa sigui ofresé e nivel mas haltu di servisio na pasaheronan i partnernan.
Ku e esfuersonan akí, CAP ta invertí den hende, fortalesé operashonnan, i drechá un fundeshi sólido pa futuro di aeropuerto di Kòrsou.
