WILLEMSTAD – Segun Airports Council International (ACI), ta ferwagt ku tráfiko internashonal di pasahero lo keda debil den e promé mitar di 2021. Sinembargo, tin señalnan kaba ku ta mustra ku lo tin un oumento signifikativo den e demanda di biahe aéreo pa e di dos mitar di 2021, segun ta mira un subida den e kantidat di personanan ku a bakuná i ku restrikshonnan pa biahe ta keda gradualmente suavisá. Biahenan doméstiko den Merka i Oropa ta biniendo bèk mas lihé ku esnan internashonal, segun e gruponan mas grandi di personanan bakuná ta biaha pa bishitá famianan i amigunan. Adishonal, e rekisitonan pa drenta ta varia pa kada destinashon internashonal, influensiando desishonnan di biahe.

E ‘overall average load factors’ pa luna di yanüari pa mart tabata 55%, 55% i 69% respektivamente. Rekuperashon di tráfiko kompará ku 2019 tabata 19% den yanüari, 22% den febrüari i 29% den mart.

“Tráfiko ta keda sumamente difísil pa pronostiká, i e impakto finansiero ta severo. Sinembargo, nos ta mira un rekuperashon den e di 2 kuartal. No solamente debí na e esfuersonan pa ku bakunashon rònt mundu, si no primeramente debí na e programa di bakunashon ku ta keda ehekutá na Kòrsou kual lo trese pronto e protekshon na nos poblashon i transformá e isla den un destinashon seif. E seguridat pa ku salú lo influensiá e desishon di biahe i nos ta spera ku e industria di turismo lo prosperá den direkshon di fin di aña”, co-CEO di CAP, señor Paulo Mazzali a indiká.

 

 

LAGA UN KOMENTARIO

Please enter your comment!
Please enter your name here