BARCELONA, SPAÑA, AFP.- Tur bar, restorant i teatro lo habri djaluna na Catalonia, despues ku a sera esakinan durante un luna largu komo parti di e medidanan pa kontené e infekshonnan di Corona vírus, segun indikashon di e gobièrnu regional.
E bar i restorantnan a sera riba 16 di òktober komo parti di e medidanan pa kombatí e pandemia, inkluyendo un toke de keda anochi i parsialmente restringí entrada for di diferente region mas den Spaña.
Pero kuminsando djaluna, tur bar i restorant ta habri bèk, ounke te ku 9:30 di anochi. Ademas, nan lo por usa solamente 30% di e establesimentu su kapasidat.
Sine i teatronan tambe lo habri, pero ku 50% kapasidat. Sinembargo, e gobièrnu a mantené e toke de keda anochi i tambe ta limitá tur movishon di hende pa drenta òf sali di e region.
Meskos ku den sobrá parti di Spaña, e infekshonnan nobo di COVID-19 a baha den Catalonia, kual a imponé un restrikshon estrikto fuertemente kritiká pa negoshinan lokal.
“Nos a logra kambia dinámika di e pandemia sin un lockdown estrikto “manera esun imponé den mart durante e promé ola di e pandemia, segun indikashon di e vise presidente lokal di Catalonia, Pere Aragones.