WILLEMSTAD.- Banko Sentral di Kòrsou i St.Maarten (CBCS) a keda selektá pa risibí sosten tékniko internashonal pa fortalesé su trabou riba tereno di senarionan di klima. Esei a tuma lugá den e promé tanda di e inisiativa di Network for Greening the Financial System (NGFS), pa fortalesementu di kapasidat (capacity building). Ku esaki, CBCS lo ta den un mihó posishon pa midi ki efekto kambio klimátiko por tin riba ekonomia i sektor finansiero tantu na Kòrsou komo na Sint Maarten.
E inisiativa aki ta respaldá CBCS su ophetivo stratégiko di integrá riesgo klimátiko i sostenibilidat den su normanan di supervishon i su funshonamentu. Riesgo relashoná ku klima por afektá ekonomia i sistema finansiero komo konsekuensia di tormenta mas pisá, sekura mas largu i temperatura mas haltu, i e ekonomianan di isla chikitu manera Kòrsou i Sint Maarten ta spesialmente vulnerabel.
CBCS ke mehorá su manera di evaluá e riesgonan aki pa, di e manera ei, e kontribuí pa e union monetario por tin un sektor finansiero resiliente i kapas pa enfrentá e retonan di futuro. Entrante 2027, CBCS su Departamento di Análisis i Investigashon Ekonómiko lo kolaborá ku un eksperto riba tereno di senario di klima, nombrá pa NGFS. Huntu, nan ta bai desaroyá modelo práktiko di riesgo klimátiko adaptá na e sirkunstansianan lokal ku ta eksistí na Kòrsou i Sint Maarten. Esei lo resultá den un transferensia di konosementu i ekspertisio spesialisá ku lo fortalesé CBCS su kapasidat pa inkorporá senario i stress test klimátiko den su análisis- i pronóstikonan ekonómiko i den su kuadro pa evaluashon di riesgo en general.
Ademas, CBCS a nombra un kordinadó di Asuntu Klimátiko, sra. Paloma Abbad, ku lo dirigí i kordiná CBCS su trabounan riba tereno di klima. E ròl aki ta kombiná diferente proseso di trabou relashoná ku análisis di senario klimátiko, investigashon riba tereno di klima i desaroyo di un kuadro koherente pa supervishon di asuntunan relashoná ku klima. Tambe, e kordinadó di Asuntu Klimátiko ta representá CBCS na foro lokal, regional i internashonal, manera Curaçao Climate Change Platform, e grupo tékniko di trabou tokante kambio klimátiko Caribbean Group of Banking Supervisors i NGFS.
