WILLEMSTAD.-Awe mainta lat trahadónan di hospital St.Elisabeth a pone trabou abou i a bai dilanti di ofisina prinsipal di gerensia di e instituto huntu ku nan lidernan sindikal. Ta asina ku trahadónan i nan sindikato CBV a bin haña sa ku aparentemente Sehos ta retené sèn for di salario pero no ta entrega e plaka ei na belasting, na banko pa hipotek ni na SVB pa kumpli ku e gastunan sosial manera lei ta preskribí. CBV a duna gerensia di Sehos un tempu pa regla kos pero te ainda no tin solushon i p’esei a pone trabou abou. Awe mainta CBV i hospital a tuma kontakto ku minister di finansa, pero minister Gijsbertha a ninga redondamente di bai hospital pa papia ku CBV i su miembronan.
Den kombersashon ku Johnsel Diaoen presidente di CBV el a deklará na EXTRA ku nan a pone deadline pa gerensia di Sehos pa duna klaridat kon ta pará ku e sènnan ku a retené di trahadónan, pero te awe ku ta 2 di òktober ainda Sehos no tabatin un kontesta satisfaktorio. Despues ku minister Gijsbertha a ninga di atendé ku trahadónan di Sehos, CBV a tuma kontakto ku minister Camelia-Romer ounke e ta den eksterior. CBV ta pendiente pa banda di 3’or pasá tende kiko ta e prome pensamentu di minister di GMN riba e situashonnan ku a surgi.
Diaoen a enfatisá ku loke CBV i su miembronan ke ta un garantia ku no ta tene trahadónan responsabel pa e debe di hipotek ku hospital a krea na bankonan, ni e debe di primanan sosial ni tampoko debe na belasting ku a krese pasobra Sehos a keda sin entrega e plaka ku a retené for di salario di e trahadónan. Mas detaye den edishon di EXTRA.
