CD ‘Kòrsou Bunita’ a keda batisá

WILLEMSTAD.- Djaweps a tuma lugá e boutismo dje disko kompakto ‘Kòrsou Bunita’. E kompakto produsí pa Glenn Martes a keda batisá na kas di Doble R i e padrino tabata sr. Steven Martina.
Glenn a komponé, areglá i kanta e 7 komposishonnan ku tin riba e kompakto. Un variashon total pa loke ta trata músika.
Glenn a splika ku el a komponé piesanan ku mensahenan positivo, nada di kritiká ni puña i ta spera ku pueblo lo sa di apresiá e produkshon musikal.
Ku e intenshon di komplasé smak di tur hende, Glenn a komponé un Wals Krioyo, Bolero, Montuno, Socumsa, Montuno Son, Gospel i un Tumba.
‘Mi ta pensa kiko e hende gusta, mi ke laga e pueblo sinti i meresé algu ku e ta gusta. E kansion ‘Kòrsou Bunita’ ta un wals krioyo i ta relatá kuantu kos bunita ku nos tin, un turista ta bin djafó i no ke bai, tur estranhero ta bin i no ke bai nan pais bek. Ki gran balor nos Kòrsou tin, ki grandi nos Kòrsou ta pa nos. Esun ku pasa aki, ora e tin ku bai su tera bek, e ta yora pasó e sa kiko e ta pèrdiendo. E kansion ta pa mustra nos yunan di Kòrsou ku nos tin un dushi lugá pa biba riba dje’, asina Glenn a splika.
Pa fin di luna, despues di dia 25 e kompakto lo ta optenibel na tur diskobar.
Pa finalisá Glenn a splika ku ya e ta den studio di grabashon. Su meta ta pa produsí 1 disko kompakto pa aña. ‘Kòrsou Bunita’ mester a sali for di fin di aña, pero a wanta e produkshon i sak’é despues di Karnaval.

SHARE

LEAVE A REPLY