WILLEMSTAD.-Un informashon di último ora ku EXTRA a tuma nota di dje ta indiká ku departamentu di estado merikano a saka un anunsio pa tur residente ku ta toka Kòrsou. Den e kaso spesífiko aki den e informe aki departamentu di estado i e ofisina ku ta trata asuntunan konsular a emití un konseho urgente kódigo kòrá pa Kòrsou. Merka a kaba di pone Kòrsou riba nivel 4. “Level 4: Do Not Travel to Curaçao due to Covid-19”.
Den e informe ta pidi tur hende pa tuma bon nota di e regla i medidanan relashoná ku Covid-19 promé ku plania kualke biahe internashonal. Centers for Disease Control and Prevention (CDC) a klasifiká Kòrsou su situashon komo esun di mas serio ku ta nivel 4. Ta bon pa splika ku Merka ta manehá 4 nivel diferente pa loke ta trata rekomendashon ora di biahe. Nivel 1 ta indiká ku por biaha pa e destinashon pero tene kuenta ku e prekoushon nesesario di medidanan básiko pa loke ta trata Covid. Nivel 2 ta indiká ku por biaha ainda pa e destinashon pero mester bai ku hopi koutela. Nivel 3 ta rekomendá pa rekonsiderá biahamentu pa e destinashon anto Nivel 4 simplemente ta indiká “Do Not Travel”.
CDC ta bisa klaramente ku si un hende pensa pa biaha pa Kòrsou e mester konsulta e página web di konsulado merikano relashoná ku Covid-19, tambe mester bishita e página web di CDC, registrá den e Smart Traveler Enrollment Program pa keda risibi alerta i notisianan di emergensia, mester sigui notisianan di Department of State via Facebook i Twitter, mester chek e relato riba kriminalidat na Kòrsou i finalmente e rekomendashon ta pa tur residente merikano mester tin un plan di kontingensia pa den kaso di emergensia.
