Willemstad/Philipsburg – Centrale Bank van Curaçao en Sint Maarten (CBCS), den
kolaborashon estrecho ku Worldline i e bankonan komersial lokal, a implementá e
infrastruktura básiko nesesario pa por ofresé Pago Instantáneo (na ingles, IP). Danki na
esei, entrante 15 di yanüari di 2022, tur pago interbankario na Kòrsou i Sint Maarten, i
entre Kòrsou i Sint Maarten, lo keda prosesá den kuestion di sekònde, 24 ora pa dia, 365
dia pa aña. Meskos ta konta pa pago interbankario entre e diferente bankonan na Boneiru.
Tur banko na Kòrsou, Sint Maarten i Boneiru lo partisipá den e sistema di kompensashon
i likidashon di pago IP CSM, ku eksepshon di dos banko komersial lokal ku lo djòin mas
den transkurso di 2022. E sistema akí, desaroyá pa Worldline, ta kumpli ku tur norma
internashonal i di ISO 20022.
Ku introdukshon di Instant Payments CSM, Banko Sentral a bira un di e promé institutonan
finansiero ku a implementá un sistema di pago instantáneo ku ta traha ku dos diferente moneda.
Pues, awor, e transakshonnan interbankario ta keda prosesá den kuestion di sekònde, 24 ora pa
dia, 365 dia pa aña, tantu na florin di Antia Hulandes komo na dòler estadounidense.
Den futuro, kolaborashon ku tur banko lokal
CBCS ta mira implementashon di e infrastruktura básiko di IP CSM solamente komo un promé
paso. Den kolaborashon ku e bankonan komersial lokal i Worldline, CBCS ta trahando kaba riba
desaroyo di mas opshon teknológiko. Unabes ku e sistema di Pago Instantáneo bira disponibel pa
tur kliente bankario riba e islanan, lo ekspandé e opshonnan pa por ofresé pago P2P (persona pa
persona), P2B (persona pa negoshi), P2G (persona pa gobièrnu) i pago den tienda mas efisiente,
tantu mobile komo on-line. Den e kuadro ei, lo evaluá pa enbolbé mas stakeholder di sektor
finansiero. I despues, lo konektá nos infrastruktura ku otro ekosistema di pago instantáneo, manera
di Aruba i Hulanda, ku ta traha a base di otro moneda.
Segun Leila Matroos, Direktor Ehekutivo di Centrale Bank van Curaçao en Sint Maarten:
‘Introdukshon di Pago Instantáneo ta resultado di nos aspirashon pa modernisá nos infrastruktura
teknológiko i stimulá desaroyo ekonómiko na Kòrsou i Sint Maarten. Asin’akí, nos ta mihó prepará
pa futuro i pa e sinfin di desaroyo ku ta tuma lugá riba tereno di pago. Ya ku nos ta kolaborando
ku un kompania eksperto riba tereno di prosesamentu di pago instantáneo den Zona Europeo,
den un siguiente fase nos lo por konektá fásilmente ku mas pais.’

‘Centrale Bank van Curaçao en Sint Maarten su implementashon di IP CSM ta un paso lógiko, mirando
ku Banko Sentral di Aruba tambe a introdusí Pago Instantáneo anteriormente. Pago Instantáneo
ta birando e norma internashonal riba tereno di pago. E sistema akí su abilidat pa prosesá Pago
Instantáneo den dos diferente moneda pareu ta muestra di Worldline su kapasidat amplio i
ambishon pa ta un di e suministradónan prinsipal riba tereno di prosesamentu di pago na nivel
mundial, segun Michael Steinbach, Direktor Gerente di Servisio Finansiero di Worldline. ‘P’esei
mes, nos ta sigui apoyá CBCS den e trayekto asina esensial akí pa implementá pago 24/7/365.
Komo e prosesadó di IP mas grandi di Zona Europeo, nos ta masha orguyoso di por traha ku
CBCS riba e implementashon akí i riba e opshonnan adishonal ku lo introdusí den futuro.’

Willemstad, 12 di yanüari 2022
CENTRALE BANK VAN CURAÇAO EN SINT MAARTEN

4 COMMENTS

LAGA UN KOMENTARIO

Please enter your comment!
Please enter your name here