WILLEMSTAD.- Gerensia di Aqualectra den persona di Neysa Isenia, a duna splikashon di loke a sosodé ku a pone ku hinter wikènt Kòrsou a konfrontá problema ku suministro di koriente. Sra. Isenia a indiká ku Aqualectra a hasi tur mantenshon nesesario pafó di e temporada di kalor, pa por tin tur mashin disponibel den e periodo aki. Sinembargo, e realidat ta ku awor ku tin mas mester di nan, kuater di nan mashinnan a kai afó pa motibu di fayonan tékniko. Aqualectra a bestèl tur piesa nesesario pa por drecha e mashinnan akí mas pronto posibel, pero komo isla chikitu e proseso pa bestèl i risibí esakinan na tempu tambe ta un reto riba su mes. Durante dianan kalor manera awor aki, Kòrsou su demanda di koriente ta yega te un máksimo di 140MW pa dia. Si tur mashin ta disponibel, Aqualectra por suministrá te ku 150MW di kapasidat. Sinembargo ku e 4 mashinnan for di servisio, nan kapasidat disponibel e dianan akí ta únikamente 100MW i nan ta dependé hopi riba bientu pa por karga ku e suministro total di koriente pa henter Kòrsou.
Kòrsou tin aworakí 70MW di kapasidat na mulina di bientu instalá. Pero dor di fluktuashonnan den naturalesa, tin momentu ku esaki ta baha asta bou di 10MW. Durante e momentunan asina e 25MW di bateria ta yuda bon, pero despues di un ratu e energia almasená den esaki tambe ta kaba. Esaki ta loke a pasa djasabra último.
Realidat ta, ku asta si tur mashin tabata disponibel, e kapasidat ta hopi pèrtá. Den e último 2 pa 3 añanan, demanda di koriente na Kòrsou a krese enormemente debí na entre otro kresementu turístiko i ekonómiko i kambionan klimatológiko. Netamente pa e motibu akí, Aqualectra a bini ta invertí tambe durante e último 3 añanan pa trese solushonnan duradero ku lo yuda evitá ku esaki tur aña ta keda un molèster. Entre otro Aqualectra a hasi invershon den kapasidat èkstra di energia di bientu, e sistema di almasenahe di energia pa medio di bateria i ta trahando pa finalisá e planta di koriente adishonal (Salu Power Plant) ku lo reforsá Kòrsou su infrastruktura ku un total 40MW di koriente.
Esaki lo pone ku e kapasidat disponibel di mashin di diesel lo alkansá 190MW, ku ta duna sufisiente espasio pa akapará Kòrsou su demanda máksimo di 140MW asta si no tin solo òf bientu. Tambe e ta duna Aqualectra espasio pa sigui krese ku Kòrsou su ekonomia. Mas detaye den edishon di EXTRA.
