WILLEMSTAD.-Investigashon independiente ta mustra ku no tabatin violashon di integridat ni komportamentu eksesivo na Kolegio di Supervishon Finansiero (CFT). Na komienso di e aña aki a sali na kla ku den seno di CFT tabatin kasonan ku meresé atenshon speshal. A drenta notifikashonnan anónimo na presidente Raymond Gradus i por lo general ta trata posibel mal komportashon dor di sekretario di Cft Ray Thuis, Stefan de Kok i eks sekretario interino Robert de Ruiter. Diferente di e notifikashon anónimo tin di aber ku ticket di business class pa buelo na Hulanda riba kosto di Cft.
Gradus ta indiká ku el a tuma e kaso na serio ounke ku e notifikashonnan tabata anónimo i a duna enkargo pa un empresa independiente hasi un investigashon. Ebben Partners ta esun ku a realisá e investigashon. E konklushon ta ku no tabatin violashon di integridat ni komportamentu eksesivo; sí a konstatá ku tabatin kaso di deskuido.
Gradus ta kontinuá: “Apesar ku a base di e investigashon no a konstatá violashon di integridat ni kondukta eksesivo, ta resultá ku tin nesesidat sí pa den sentido general introdusí mehorashon den e organisashon atministrativo i pa hasi e proseduranan interno mas skèrpi.”
Riba un otro tereno tambe lo hasi un korekshon. Asina ta ku te desèmber 2019 tabata paga anualmente un gratifikashon di Pasku di ANG 1.000 neto na tur empleado di e sekretariado. Pa e personal lokal tabata konvertí e gratifikashon aki den un suma bruto. A keda sin hasi e prosesamentu atministrativo aki pa e personal ku ta bini di eksterior. Lo konsultá awor ku e Ministerio di Asuntunan Interno i Relashonnan den Reino kon ta konvertí e suma neto ainda den un suma bruto pa e empleadonan aki. A base di un ouditoria lo determiná mas despues si a kumpli korektamente ku e proseduranan di e atministrashon di salario. Mas detaye den edishon di EXTRA.
Lo tin investigashon na gerensia di Cft tokante posibel mal komportashon
