Mester subi penshun di behes di 62 pa 65 mas lihé posibel
Philipsburg.- Kolegio di supervishon finansiero (Cft) ta hasi un yamada na Sint Maarten pa aprobá e presupuesto di 2019, kual ya ta basta atrasá kaba. E aprobashon aki ta nesesario pa por optené fiansa, por ehèmpel, pa rekonstrukshon di e aeropuerto, i pa por kuminsá ku proyekto ku ta oumentá e entradanan di gobièrnu, manera reforma di Servisio di Impuesto i mehorashon di e maneho finansiero. E mensahe prinsipal di Cft durante e bishita aki ta: tradusí e plannan den akshon i resultado palpabel.
Sint Maarten te ainda no tin un presupuesto aprobá pa 2019. Cft ta pidi Parlamento pa tuma un desishon tokante e konsepto di presupuesto mas pronto posibel. Un presupuesto pa 2019 ta brinda gobièrnu un base legal pa e gastunan planifiká i ta un kondishon pa inisiá proyekto importante i – i pues tambe – e fiansanan nesesario. Cft ta enfatisá importansia di un atministrashon fortifiká di impuesto, ku mester kondusí na e tan nesesario oumento struktural di entrada di gobièrnu. Lo por uza e entradanan futuro aki pa realisá e tareanan gubernamental nesesario, eliminá e retrasonan den pago aktual i redusí e debe di e pais.
Otro kuestion ku a reuní tokante dje durante e bishita di Cft ta ehekushon di e presupuesto di 2019, preparashon di e presupuesto di 2020, sosten di likides i e estado aktual di e instrukshon di Konseho di Minister di Reino di 2015. Pa kumpli ku e instrukshon ei Sint Maarten mester kompensá su défisitnan di pasado, eliminá su retrasonan den pago i hasi e sistema di kuido i penshun di behes di e pais mas sostenibel. Relashoná ku e último aki, Sint Maarten a proponé pa subi edat di Penshun di Behes di 62 pa 65 aña na 2020. Cft ta konsehá Sint Maarten pa start e proseso presupuestario pa 2020, di moda ku den e próksimo lunanan lo tin un konsepto di presupuesto i por inkluí den dje subida di edat di Penshun di Behes. Cft ta ekspresá su desapunto pa ku e echo ku te ainda no a implementá e adaptashon di e legislashon tokante di penshun, manera a keda primintí. Mas retraso ta totalmente indeseabel. Mas detaye den edishon di EXTRA.
