YAMENA, CHAD, AFP.- Un total di 401 persona arestá den protestanan luna pasá ku a laga sigur 50 morto na Chad lo tin di aparesé dilanti di wes, asina fiskal di e pais afrikano a informá.

E oudiensianan lo tuma lugá den prisòn di seguridat haltu di Koro Toro mei mei di desierto, na mas di 600 kilometer nortost di N’Djamena, kapital di Chad.

Míles di persona konvoká pa oposishon a manifestá dia 20 di òktober den henter e pais kontra ekstenshon pa dos aña di periodo di transishon polítiko i kontra e mantenshon na poder di general Mahamet Idriss Deby Itno.

E general Deby di 38 aña, a tuma poder na aprel 2021 despues ku su tata Idriss Deby Itno a muri den un operashon kontra rebeldenan despues di tres dékada di a dirigí e pais ku man di heru.

E hunta militar a primintí di tene elekshonnan liber i demokrátiko despues di un transishon di 18 luna renovabel un solo bia, despues di a disolvé parlamentu i e gobièrnu. Pero despues a ekstendé e di dos prolongashon te ku 24 luna.

Oposishon, e oeneganan di Chad i ekstranheronan, meskos ku Union Oropeo i Union Afrikano a kondená e uso eksesivo di forsa kontra sivilnan den represhon di e protestanan.

LAGA UN KOMENTARIO

Please enter your comment!
Please enter your name here