CHARLOTTE, AP. – Outoridatnan tabata trata ayera di kalma e rabia di e públiko i koregí loke a keda deskribí komo informashon falsu, miéntras Charlotte tabata enfrentá e di dos anochi di protestanan violento, uniendo nan mes na e lista di siudatnan merikano kaminda e furia a lanta debí na morto di un hòmber koló skur na man di polis. Un hòmber a muri djámars, despues di a risibí tiru. Abitantenan a lanta kontra outoridatnan i protestá dilanti di polis bistí ku ekiponan antimotin den serkania di un hotèl sentral.
Polis a kuminsá tira granat di huma pa kibra e multitut ku tabata tira ophetonan kontra e ofisialnan di polis. Polis a tira gas lakrimógeno den e grupo di manifestante i mayoria di nan a kore pa esaki. Keith Lamont Scott di 43 aña a muri tirá pa polis i esaki a sòru pa lanta aun mas furia di e manifestantenan, mas ainda pasobra tin 2 vershon diferente riba loke a sosodé. Polis ta bisa ku Scott no a obedesé òrdu pa e baha su pistol miéntras ku abitantenan di e bario ta bisa ku e tabatin un buki den su man, miéntras e tabata warda su yu baha di bùs di skol. E morto a lanta tenshonnan rasial den un siudat ku tabata parse di a tuma distansia di e problemanan ku tabata sosodé na otro partinan di Merka.
ULTIMO ORA
Ayera nochi lat a deklará estado di emergensia den e estado di Charlotte. E gobernador di north Carolina Pat McCrory a dekretá ayera nochi estado di emergensia na Charlotte despues di e di dos anochi di protestanan violento pa un tiroteo polisial.
McCrory a bisa den un komunikado ku lo manda guardia nashonal pa Charlotte, e siudat mas grandi di e estado, kaminda gruponan di manifestantenan tabata sigui ataká reporteronan i otro personanan, kibrando bentana i tabata sende kandelanan chikí. E protestanan di ayera a kuminsá komo un vigilia pero un grupo a separá di e akto prinsipal i a marcha pa e sentro. E marcha a bira violento despues di ku un partisipante den e protesta a keda heridá di gravedat.
E polisnan a koregí e informashon ku tabata sirkulá ku e hòmber lo a muri.
E problema ta sintá ku polis a nenga di revelá e video di e tiroteo di djamars kaminda Keith Lamont Scott a pèrdè su bida.
