CARACAS, ( AP) . – E kampaña presidensial na Venezuela a kuminsá ofisialmente ayera, ora presidente Hugo Chávez i e lider di oposishon Henrique Capriles a enkabesá reunionnan di nan siguidónan, loke ta primintí di ta un bataya pisá ku lo kulminá ku e elekshon na òktober.
Chávez tabatin su klásiko bonèchi kòrá miéntras e tabata saludá i tabata tira sunchi pa e multitut di simpatisadónan for di riba un vehíkulo ku a kore for di un pueblo chikí di estado Carabobo te na e kapital bisiña di estado Aragua, Maracay, kaminda el a tene un diskurso largu.
‘E orkan bolivariano a kuminsá!’, asina Chávez a bisa e multitut.
Capriles a kuminsá ku reunionnan na otro lugánan di e pais: den estado Bolívar, na sùitost di
e pais, i den estado Zulia na wèst di e pais.
Sin menshoná e mandatario na su nòmber, Capriles a bisa su partidarionan den estado Bolívar, ku ‘esun ku ta na poder, solamente loke ta interes’é, ta di keda na poder’.
‘Mi ta forma parti di un liderazgo nobo, mi ta aki pa buska solushon pa su problemanan’, el a bisa.
Chávez a okupá e stul presidensial for di 1999 i ta buska manera pa keda seis aña mas na poder despues di e elekshon di dia 7 di òktober.
