Na Venezuela ketu bai regularmente tin protesta di venezolanonan ku ta demandá e regreso di Nicolas Maduro komo presidente dje pais.
CARACAS (AFP).- Chavismo tin intenshon di manda un promé lote di kartanan dirigí na e presidente bahá Nicolás Maduro, kende ta den un prizòn na Merka.
Partido Socialista Unido de Venezuela (PSUV) ta organisá e rekolekshon di kartanan, ku a kuminsá den fin di siman último.
Maduro a kai dia 3 di yanüari ora ku militarnan norteamerikano a drenta Venezuela ku bombardeo den e kapital Caracas i otro regionnan serka. Su kasá, Cilia Flores, tambe a keda kapturá. Tur dos ta spera nan kaso den korte na New York.
“Nos ta bai kolektá e kartanan e siman akí, i ya pa djamars otro siman lo hiba nan New York”, segun Nahum Fernandz, hefe di gobièrnu di Caracas. “Nan mester risibí e kartanan ku pueblo ta manda pa e presidente”. Fernandez a indiká ku na lo apelá na un lei federal norteamerikano ku ta permití pa manda karta pa prezunan.
E partido di gobièrnu a mobilisá den Caracas i siudatnan di interior pa eksigí liberashon di Maduro i Flores. “Nos ta warda riba bosnan, presidente i Cilita”, segun un dje mensahenan skirbí riba pida tela blanku di span entre palunan di mata durante di un konsentrashon di adultonan mayor djarason último den Caracas.
“Nos ta resando pa bosnan regreso”, segun un dje kartanan. Un otro ta bisa “Maduro, nos ke bosnan serka nos”, tambe “Mi stima bo Nico, bin bèk lihé”, “Mi presidente Nicolas i diputado Cilita, nos ta spera bosnan sano i bibu”, segun kontenido di algun dje kartanan.
