SANTIAGO, CHILE, AFP.- Chile a anunsiá djamars ku a forma un akuerdo pa haña miónes di dósis di vakuna kontra Corona vírus na momentu ku esakinan keda aprobá, segun indikashon di presidente Sebastian Piñera.
E mandatario a splika ku a yega na un akuerdo ku Covax, un inisiativa global di Organisashon Mundial di Salú, Union Europeo, algun pais latinoamerikano i fundashonnan manera esun di Bill i Melinda Gates. E akuerdo ta duna Chile akseso na ocho mion dosis di vakuna di su eskoho. E vakuna di eskoho mester ta unu ku aprobashon di OMS.
Chile a reservá 14,4 mion dósis di vakuna desaroyá pa AstraZeneca huntu ku Universidat di Oxford i ta den proseso pa sera un akuerdo ku laboratorio Sinovac di China pa realisá ensayonan klíniko den Chile.
Piñera a bisa ku ora e pais haña un vakuna “safe i efikas” lo vakuná e parti mas vulnerabel di e pueblo, kual ta mas o ménos sinku mion chileno, ekivalente na 26% di e pueblo. Esaki ta inkluí trahadónan di salú, esnan riba 65 aña òf ku problema króniko di salu i esnan ku ta biba den sentronan será. Despues di esaki lo kontinuá ku sobra parti di e pueblo.
