SANTIAGO DE CHILE, AP.- E tenshon entre Chile i Bolivia a bira mas intenso despues ku e kansier chileno Heraldo Munoz a afirmá ku e Minister di Defensa di su pais bisiña no por pone pia riba suela di Chile debí ku el a ofendé presidente Michelle Bachelet.
Minister di Defensa Boliviano Reymi “Ferreira no por baha riba suela di Chile” segun indikashon di Munoz. El a agregá ku si Fereira “diskulpa formalmente” Chile por rekonsiderá pa dun’e visa.
Ferreira a indiká ku e no ta pidi diskulpa na Munoz.
Riba 19 di mart, polisnan chileno a detené dos militar i shete agente duanero di Bolivia, akusá di ladronisia ku violensia i tambe di karga arma ilegal i kontrabanda. Un korte a ordená su detenshon preventivo pa 120 dia pa fiskal lokal logra haña prueba pa sostené su akusashon.
Pero outoridat di Bolivia ta informá ku su kompatriotanan ta sekuestrá.
Ferreira a ekspresá su intenshon di biaha pa Pozo Almonte, 1.800 kilometer na nort di Santiago i kaminda e militar i funshonarionan duanero ta detené, pero Chile a rekord’é ku Bolivia mester di visa pa drenta e pais.
