BEIJING, AP.- Masha poko pais lo konsiderá e práktika pa aisla siudatnan kompleto ku miónes di habitante pa kontené un brote, pero esaki ta posibel na China debí na e kontrolnan sosial ekstenso di e Partido Komunista i dor di e pais su eksperensia pa kombatí e brote di síndrome respiratorio grave (SARS), kual a sosodé entre 2002 i 2003.
E promé siudat ku a keda aisla tabata Wuhan, e episentro di e brote coronavirus i ku un pueblo di 11 mion persona. Despues di esaki, outoridat a blòkia akseso na siudatnan manera Hubei, inkluyendo Huanggang ku 7 mion habitante. Aparte di esaki outoridat a aisla Ezhou, Chibi, Qianjiang, Zhijiang, Jingmen, Xiantao, Xiaogan i Huangshi. E kantidat di habitante kombiná ta 33 mion persona.
Funshonarionan a suspendé tur servisio di trein, avion, busnan i fèri. Generalmente, Wuhan ta un di e aeropuertonan mas transitá na China, ku 600 buelo pa dia. e servisio di bus munisipal i metro tambe a keda suspendé. Tur outo i trùk a wòrdu revisá na diferente punto di kontrol riba kareteranan for di den siudat. Tur sine, parkenan di dibershon i otro sitionan a haña òrdu pa keda sera.
Mayoria residente ta koperá ku outoridat su petishon pa keda den kas i evitá di propagá e vírus aki. Aparte di esaki, e Partido Komunista tin un di e sistemanan mas amplio di vigilansia i kontrol sosial. Tur siudat ta yen di kámaranan di video i e partido gobernante a desaroyá diferente sistema pa vigilá e públiko i monitor internèt.
