MADRID (AFP).- E fábrika di outo chines Chery a formalisá e trámitenan na Spaña kaminda lo produsí outonan, prinsipalmente eléktriko, kuminsando na final di 2024, den un señal nobo dje apetit chines pa e merkado europeo apesar dje choke ku Brussels.
Chery, konosí pa su outonan ekonómiko, ta e di dos marka chines ku a anunsiá su fábrika na Europa, despues dje gigante BYD, ku den febrüari a anunsiá e konstrukshon di su promé fábrika europeo na Hungria, ku lo ta operashonal den tres aña.
E yegada di Chery, mediante un akuerdo anunsiá djamars, ta tuma lugá danki na kreashon di un empresa konhunto ku e spañó Ebro-EV Motors, grupo spesialisá den fabrikashon di pick-up eléktriko i susesor di un marka bieu di trùk i outo ku a disparsé den 1987.
E empresa konhunto, den kua e akshonista mayoritario ta e grupo spañó, lo usa un fábrika bieu di Nissan ku a sera den desèmber di 2021.
E proyekto aki lo permití kreashon di “1.250 kupo di trabou”, kuminsando ku e kontratashon di “150 trahadó den próksimo lunanan”, segun e sosionan ta bisa den un komunikado.
E planta di Nissan, ku tabata empleá 3.000 persona, a keda bendé parsialmente den 2021 ku e fabrikante di bròmfits Silence i na Ebro-EV Motors.
Segun e akuerdo formalisá ayera den un akto ku presensia dje presidente di gobièrnu spañó, Pedro Sanchez, i dje vise presidente di Chery, Guibning Zhang, e grupo chines lo ensamblá den e próksimo lunanan, danki na e infrastruktura eksistente, vehíkulonan di koriente di su modèl Omoda5.
Kuminsando e di kuater trimèster di 2024, tambe lo produsí outonan estilo SUV eléktriko komersial bou dje marka Ebro.
Chery i Ebro ta mek riba un produkshon total di 50.000 vehíkulo pa 2027 i 150.00 kuminsando 2029, segun nan ta bisa den un komunikado.
