BEIJING, AP.- E poblashon di China ku ta nabegá riba Internet ya ta esun mas grandi rònt mundu, pero awor a krese ku 538 mion usuario di Internet, danki na e kresementu di e nabegashon di Internet. Asina un grupo di e sektor a bisa djaweps.
E sifra nobo aki ta representá un oumento di 11% pa ku e aña promé, segun informashon di Sentro di Informashon di Retnan di Internet na China a splika. E grupo, outorisá pa gobièrnu, a bisa ku e sifra ta nifiká tambe ku e tasa di poblashon ku ta usa Internet na china a subi na 39,9%.
E montante di personanan ku ta nabegá ku telefonnan selular i otro aparatonan a krese na
388 mion segun e grupo a bisa. Esei a nifiká un oumento di 22% kompará ku e aña promé.
E gobièrnu komunista di China ta promové e uso di Internet pa negoshi i edukashon, pero ta trata di blòkia e akseso na material ku nan ta konsiderá opseno òf di gueria. Outoridatnan a reforsá nan kontròlnan despues ku retnan sosial i otro sitionan “online” tabata un faktor klave pa e protestanan ku a provoká kaida di e gobièrnunan di Egipto i Tunesia.
E oumento di e uso di Internèt i popularidat di esaki a impulsa websitenan di chines nobo.
E reguladornan a reforsá e luna aki nan kòntròl tokante e videonan “online” i a ordená e proveedornan pa verifiká tur material promé ku pèrmití kualkier persona pa wak esaki. E gobièrnu a keha ku algun video “online” ta bulgar, pornográfiko òf demasiado violento.
