Un bista aéreo di e flota di 100 bùs ku China a regalá na e gobièrnu nikaragwense durante di un seremonia na Managua ayera.
SAN JOSE, Costa Rica (AFP).- China a hasi un donashon di 100 bùs na Nicaragua den un asistensia nobo na e gobièrnu di Daniel Ortega i Rosario Murillo, ku ta enfrentá sanshonnan norteamerikano i europeo pa violashon di derechinan humano.
E bùsnan di transporte públiko a keda entregá den un akto nokturno enkabesá pa e pareha presidensial i ku músika den e sentro di Managua.
“Ta trata di un donashon di gobièrnu di Repúblika Popular China den kuadro di un pakete di asistensia grátis”, segun e embahador chines Chen Xi, den un diskurso.
“E donashonnan akí no ta mará na ningun kondishon polítiko”, Chen a bisa, agregando ku “vários otro proyekto ta den estudio” i ku empresanan di tur dos pais ta kooperá di forma mutuo”.
Ortega den 2021 a reanudá e relashonnan diplomátiko ku China, despues di a kibra ku Taiwan, konsiderá pa Beijin komo parti di su teritorio.
Danki na e pueblo chines, danki na e Partido Komunista chines i danki na presidente Xi Jinping”, Ortega a bisa den un diskurso di mas ku un ora.
“E bùs lo keda usá pa e famia trahadó”, segun e ko-presidente. Di su parti, Murillo a bisa na medionan ofisialista ku “transporte ta un derecho”.
Ortega tambe a referí na e ròl di Union Europeo den e guera entre Rusia i Ukrania i a akusá e bloke di ta “armando” Kiev.
E presidente nikaragwense, un èks-gueriyero di 79 aña kende pa promé biaha a goberná Nicaragua den dékada di 1980, ta keda akusá pa organisashonnan humanitario di a krea un ”diktadura familiar” huntu ku su kasá Murillo, di 73 aña.
