Bosero di Ministerio di Relashonnan Eksterior di China, Lin Jian.
BEIJN, China (AFP).- China a hasi un yamada riba Merka pa “stòp di menasá i chantagiá” despues ku White House a pone den skochi di Beijin e responsabilidat pa start un negosashon pa para e guera komersial entre e dos ekonomianan grandi di mundu.
E presidente norteamerikano Donald Trump, a lansa un guera di impuesto kontra di aliadonan i rivalnan den kua China a karga ku e parti di mas pisá, ku tarifanan adishonal di 145% pa su produktonan por keda importá na Merka.
E gigante asiátiko a respondé ku impuestonan di 125% pa produktonan norteamerikano.
“China no tin deseo di bringa pero no tin miedu pa bringa”, segun Lin Jian, bosero di Ministerio di Relashonnan Eksterior.
“Si Merka enbèrdat ke resolvé asuntu mediante diálogo i negoshashon, nan mester stòp di pone preshon, stòp di menasá i chantagiá i papia ku China riba base di igualdat, rèspèt i benefisio mutuo”, segun el a argumentá. For di su yegada den White House den luna di yanüari, Trump a imponé impuesto adishonal di 145% riba kantidat grandi di produkto chines ku ta bini riba e tarifanan apliká pa e gobièrnunan anterior, ku un total ku ta yega te 245%.
Sinembargo, den un aparente indikashon di ke suavisá kos, su atministrashon a kita e peso èkstra for di produktonan manera kòmpiuter, ‘smartphone’, telefòn i chepnan elektróniko di kua China ta un gran produktor.
E insertidumbre provoká pa e impuestonan norteamerikano por tin “konsekuensianan negativo grave”, spesialmente pa e ekonomianan mas vulnerabel, segun Ngozi Okonjo-Iweala, direktor di Organisahon Mundial di Komersio.
