BEIJING, AP.- Tres dia i áwaseru intenso na sùit di China a laga 50 morto i 12 persona pèrdí, segun informashon di outoridatnan.
E áwaseru torensial a mata 27 persona i laga 12 persona pèrdí, for di djaweps den e provinsia di Hubei den sentro di e pais, segun ku e departamento di Asuntunan Sivil den e region a splika. Kasi 400.000 persona tabata evakuá òf mester di yudansa den e zona.
Den e provinsia di Guizhou, na sùitwèst di China, a konfirmá morto di 23 persona despues di un deslave djabièrnè.
Normalmente e tormentonan aki ta afektá e parti sùit di China kada aña, pero e temporada di áwaseru tabata unu spesialmente severo.
Outoridat enkargá di kontrolá e riu Yangtze, a ordená pa outoridatnan lokal prepará pa e inundashonnan grandi.
