BOGOTA, Colombia (AFP).- Ayera a kompletá kuater dia di enfrentamentu entre guerianan di Colombia na e frontera ku Venezuela, loke a laga por lo ménos 80 morto i míles di hende ku a hui for dje region kampañá pa operashonnan militar pa protehá e sivilnan.
Ta kalkulá ku mas di 80 persona a pèrdè nan bida, mas di 20 ta heridá i den kareda di 5.000 habitante a hui for dje region segun gobernador dje departamento di Norte de Santander, William Villamizar.
Terorisá pa e violensia arma, desena di kolombiano i venezolano kargando apénas un saku di paña a hui den botonan direkshon pa Venezuela, kaminda gobièrnu for di djasabra a aktivá un “operashon spesial” pa atendé ku esnan ku ta hui pa e enfrentamentunan.
For di djaweps, rebeldenan di Ejército de Liberación Nacional (ELN) i disidentenan di e ya no eksistente FARC, kendenan a nenga na firma e akuerdo di pas den 2016, ta enfrentá otro pa kontròl dje region Catatumbo, un region stratégiko pa produkshon di kokaina. E poblashon sivil a keda meimei di balanan i tambe ta blanku di asesinatonan selektivo, segun outoridatnan.
Segun outoridatnan, entre esnan ku a pèrdè nan bida ta figurá shete èks-kombatiente di FARC kendenan a firma e akuerdo di pas.
E entidat ku ta sali dilanti pa protekshon di derechinan humano mas aleu a denunsia ku e rebeldenan di ELN tabata bai ”di kas pa kas” pa buska personanan ku nan ta konsiderá di tin relashon ku disidentenan di FARC, pa mata nan.
Den otro region di nort dje pais, ELN tabatin enfrentamentu ku Clan del Golfo, e kartel di droga mas grandi di Colombia, ku un balansa di nuebe morto.
