CITRO ta kumpli mitar siglo ta hasi trabou di reskate

WILLEMSTAD.- CITRO ta anunsiá ku orguyo ku e aña aki e ta selebrá su di 50 aniversario. For di su establesimentu na 1976, e organisashon a krese, kaminda e balor di bida ta pará sentral. E hubileo di oro akí ta marka un mitar siglo di inovashon, kresementu i relashonnan duradero. Pa selebrá e momentu spesial akí, CITRO ta presentá artíkulonan eksklusivo di aniversario. E artíkulonan akí, ta kubri e periodo for di su fundadónan i boluntarionan te ku e operashon aktual, pa ilustrá su historia riku i e bista riba futuro.

“Sinkuenta aña komo organisashon boluntario ta sigur un logro grandi,” señor Joop Kooyman, e inisiadó tras di e fundashon di CITRO, ta deklará. “E hubileo aki ta danki na e boluntarionan ku ta kla 24/7 pa akshonnan di búskeda i reskate riba laman. Nan ta hasi esaki lihé i 100% sigur, i ta forma e fundeshi ku a hasi CITRO loke e ta awe.” E organisashon ta orguyoso di e logronan ku el alkansá i ta konfia ku e futuro lo ta briante.

E nesesidat di un organisashon di reskate riba laman
Segun lei, un aeropuerto kantu di awa mester tin un organisashon di reskate disponibel. Pa un isla esei ta esensial, konsiderando ku nos ta kompletamente rondoná pa awa i e posibilidat pa aksidente riba laman semper t’ei. Riba tera semper tin ambulans disponibel, riba laman botonan di reskate ta un nesesidat; un konsepto ku na Ulanda i Inglatera ta eksistí pa mas ku shen aña kaba.

Di plan polítiko pa un organisashon vital
Na òktober 1970, èks Minister di Tráfiko i Transporte di Antia Ulandes, Leo Chance, a tuma e desishon pa lansa un komishon di Búskeda i Reskate. Debí na diskushonnan polítiko i opstákulonan organisatorio, CITRO a ser fundá ofisialmente dia 5 di mei 1976. Un di e personanan ku a hunga un ròl importante tabata Joop Kooyman. Pa añanan largu, ku un dedikashon inkansabel, el a hinka su tempu pa desaroyá e organisashon i a keda na mando pa mas o ménos 25 aña. Internashonalmente tambe a nota impakto di su trabou; dia 8 di novèmber 2018 na Oslo, Noruega, el a risibí e prestigioso ‘Lifetime Achievement Award’ di e International Maritime Rescue Federation (IMRF) pa su dedikashon pa dékadanan largu na e sektor marítimo. E premio aki ta e rekonosimentu mundial mas haltu den e sektor di reskate marítimo i ta ser otorgá únikamente na personanan ku a laga un marka eksepshonal i duradero riba salbamentu di bida riba laman. Joop Kooyman, ku awor tin 96 aña di edat, te dia di awe por konta ku hopi pashon tokante tur e logronan ku e organisashon a alkansá desde e tempu ei.

E mishon: asistí sin e meta di ganashi
Ounke mundu a kambia formalmente den e último sinkuenta añanan, e fundashon su meta a keda firme for di 1976. CITRO Kòrsou tin komo meta pa duna yudansa i asistensia na tur persona ku ta den peliger òf ku ta kore riesgo di drenta den peliger den e awanan rondó di e isla. For di komienso a stipulá ku rekompensa finansiero no ta pas ku e mishon di e organisashon. Yudansa i reskate ta sosodé estriktamente sin meta di ganashi; esaki ta mantené e motivashon real i ta protehá e balornan fundamental di e organisashon. Esaki ta nifiká si ku CITRO ta dependé di otro tipo di finansiamentu. E trabou di reskate ta posibel danki na e kontribushon di donatùr i reskatadónan, òf asina yamá ‘redders aan de wal’. Parsialmente esaki ta sosodé komo kolaborashon pa loke Citro ta para p‘e i parsialmente pa motibu di seguridat kolektivo; hopi praktikante di deporte di awa i nabegante profeshonal ta duna nan donashon ku e pensamentu: “E organisashon di reskate t’ei pa ami tambe.”

Di ‘CITRO 1’ pa un unidat profeshonal
E profeshonalismo aktual ta un kontinuashon di for di e añanan di inisio, ku CITRO 1. Desde 1990 e organisashon a traha duru pa sigui desaroyá den un mundu ku ta krese rápidamente. E mishon pa salba bida tin sinkuenta aña kaba firmemente na vigor, pero e ehekushon di esaki entretantu a krese bira un unidat ku diferente spesialisashon. Mas o ménos kuarenta boluntario ta dediká nan mes dia i nochi sin ningun interes personal, kaminda nan ta kombiná nan trabou di reskate ku nan trabou regular i responsabilidatnan sosial. E organisashon ta repartí den timnan ku ta spesialisá den: Operashon (e tripulashon di reskate aktivo), e Grupo Tékniko (mantenshon di botonan i material), Support (marketing, komunikashon i rekoudashon di fondo) i CITRO Médiko (sosten i konseho médiko). Manera sa ser bisá hopi biaha den e organisashon: “Boluntario, pero no sin obligashon.”

Pionero den awa i den aire
E inisio na 1976 tabata tur kos ménos fásil. For di e inisio te ku 1990, CITRO no tabatin un boto di reskate di su mes. Den e promé añanan, e organisashon tabata hasi apelashon na doñonan di yate, ku den kaso di emergensia tabata pone nan propio yate disponibel pa akshonnan di reskate. Asina a nase e CITRO Sea Auxiliary, un grupo di mas o ménos dies doño di boto dediká. Banda di e yudansa riba awa, tabatin tambe un Air Auxiliary, kaminda pilotonan ku avionnan deportivo tabata pone nan mes disponibel pa akshonnan di búskeda riba laman. Remarkabel tabata e generosidat di e personanan akí; ounke CITRO tabata ofresé pa kubri e gastunan di kombustibel, pioneronan manera Piet Dijk, Rupert Breusers, Eddie de Kort i Joop Willems kasi semper tabata ninga esaki. Nan esfuerso a proba ku trabou di reskate ta drai rondó di forsa humano i boluntat.

Historia di e CITRO 1
Na 1990 tabatin un nesesidat grandi pa un boto di reskate propio. Danki na Nederlandse Ontwikkelingshulp, CITRO por a kumpra su propio boto di reskate pa promé biaha. Dia 18 di mei 1990, un Rigid Inflatable Boat (RIB) kompletamente nobo a yega Kòrsou abordo di un barku di guera. A batisá e barku akí ku e nòmber CITRO 1. Pa promé biaha e organisashon tabata disponé di un boto ku tabata spesífikamente diseñá pa operashonnan di reskate pisá, loke a kambia e direkshon pa profeshonalisashon di CITRO.

Desde e tempu ei, CITRO a keda modernisá kontinuamente. E boto prinsipal aktual ta Dick Braakman, nòmber di e dòkter ku tabata na e inisio di CITRO Médiko. Entre tantu, e flota a sigui krese, konsistiendo di C-Rescue 1 (trahá segun e stándarnan haltu di KNRM na Ulanda), dos Seadoo di reskate (Dushi 1 i Dushi 2) un ‘drone’ INSPIRE avansá i un vehíkulo di reskate. Ku e materialnan akí, e organisashon por reakshoná mas lihé ku nunka promé, ora ku bida di hende riba laman ta na peliger.

Un fundashon independiente
E kresementu di e flota i e kompra di material di kalidat haltu ta posibel solamente danki na sosten di komunidat. Na establesimentu di e fundashon, CITRO a skohe konsientemente pa keda independiente, kual ta un bentaha grandi ya ku e organisashon por operá di forma outónomo. E outonomia aki ta garantisá ku e enfoke ta keda semper kaminda e mester ta: riba salbamentu di bida.

Sosten di komunidat i empresanan lokal
Ounke CITRO ta independiente, e organisashon ta mashá agradesidu na e empresanan ku ta kere den e mishon sin interes personal di e fundashon. Por ehèmpel, GIRO Bank a finansiá un boto di reskate i e promé Seadoonan a ser finansiá pa Refineria Isla. E Seadoonan aktual a ser finansiá pa CTB. Empresanan grandi ta mira e nesesidat di un servisio di reskate profeshonal i ta duna un kontribushon supstansial na na e organisashon. Banda di esaki, rekoudashon di fondo ta un parti indispensabel pa e operashon diario. Nochinan di pelíkula, eventonan i publikashonnan manera den e revista Antillean Navigator a pèrkurá pa stabilidat finansiero nesesario atraves di añanan.

Kada florin ta konta riba laman
Komo ku CITRO no tin e meta pa hasi ganashi, kada florin Karibense ku drenta ta bai bèk direktamente den e organisashon. E sèn akí ta ser usá estriktamente pa kumpra material i mantenshon di e botonan, i tambe pa preparashon di e boluntarionan pa bira reskatadó profeshonal. Solamente ku material di nivel e boluntarionan por ehekutá nan trabou na un manera sigur i efektivo. Sosten di e donatùrnan ta, den sentido literal, e kombustibel ku ta mantené e organisashon bibu.

CITRO ta hasi e diferensia
Den e último sinku dékadanan, CITRO a proba ku nan ta un un organisashon ku meresé di eksistí sinku dékada mas. Ounke desasternan na gran eskala afortunadamente ta skars, e organisashon ta sali pa duna yudansa sigur un mínimo di dies biaha pa aña. Tin biaha ta trata di barkunan ku a pega, tin biaha di emergensianan médiko krítiko riba laman, i den otro kasonan CITRO ta garantisá siguridat durante eventonan públiko riba laman.

Un ehèmpel di e dedikashon aki ta un operashon nokturno na Boca Largu, San Juan. E boluntarionan a salba un boto ku kuater persona abordo i un Seadoo, kaminda C-Rescue 1 a tou e dos vehíkulonan pa Playa Daaibooi. Te banda di 5:30 di mardugá ku e reskatadónan por a bolbe kas. Evakuashonnan médiko tambe ta forma un parti fundamental di e trabou, manera e akshon kaminda un buseadó a bira malu na Klein Kòrsou. Despues di konseho radio-médiko, a koordiná un evakuashon huntu ku helikòpter, pa asina e pashènt por a yega na Curaçao Medical Center (CMC) na tempu. Èks-miembro di e tripulashon i di direktiva, señor Herman Verboom, ta rekordá ku por lo ménos un biaha pa aña un persona ta kai den laman na Noordkant. Un ehèmpel tabata e situashon kaminda un mucha muhé, mará i ku boka tapá ku teip, a ser tirá bibu den awa. Un suseso trágiko kaminda CITRO a hunga un ròl klave pa, huntu ku e helikòpter di Wardakosta, saka e kurpa sin bida for di awa.

Banda di e akshonnan di reskate pisá aki, CITRO ta guia strukturalmente eventonan grandi, manera e evento di aña nobo na Jan Thiel, Fuikdag (inkluso e Fuikdag Clean-up) i e Swim and Surf for the Roses. Tambe CITRO a vigilá siguridat di e buseadónan durante e intento pa e Guinness World Record di CASHA. Loke sinembargo ta pisa mas ainda ku e kantidat di akshonnan, ta e echo ku e boluntarionan ta kla pa duna servisio 24/7. Pa un piskadó, praktikante di deporte di awa òf turista, e disponibilidat inkondishonal akí hopi biaha ta nifiká literalmente e diferensia entre bida i morto.

E ret marítimo
E ròl di CITRO den e kadena di informashon a pasa den un transformashon remarkabel atraves di e dékadanan. Den e añanan promé ku Wardakosta, CITRO tabata e úniko punto di kontakto den kaso di emergensia; notifikashonnan di polis òf di famianan preokupá tabata drenta direktamente serka e organisashon. Den e fase di pionero akí, CITRO mes tabata determiná e strategianan di búskeda i tabata koordiná e akshonnan for di e kas di boto òf for di nan propio vehíkulo di reskate.

Un sinergia fuerte ku Wardakosta
Seguridat marítimo a haña un base ofisial i sólido den añanan ’90 ku di e establesimentu di Wardakosta. Awendia notifikashonnan di emergensia ta drenta sentralmente via e number di emergensia 913, i e ehekushon operashonal a bira un trabou konhunto.

E relashon entre e dos organisashonnan no ta sin obligashon; e ta ankrá den un konvenio ofisial. Den e akuerdo aki, e repartishon di tarea i e proseduranan durante mishonnan di reskate ta stipulá. Miéntras  ku Wardakosta hopi biaha tin e mando general, CITRO ta proba bes tras bes di ta e partner táktiko ku e ekspertisio lokal nesesario. Danki na e esfuerso inkansabel di e boluntarionan, siguridat den nos awanan awendia ta mas garantisá ku nunka promé.

Bista riba futuro: E Balor di Bida
CITRO ta wak nan historia ku orguyo, pero e enfoke ta prinsipalmente riba futuro i e konvikshon ku kada bida humano tin balor, resumí den e ekspreshon: “E Balor di Bida.” CITRO ta sigui invertí den e último hèrmèntnan i téknikanan pa oumentá e impakto di e trabou di boluntario i pa antisipá proaktivamente riba e desafionan di e tempu moderno.

Kontribuí na e próksimo 50 añanan
Éksito di un organisashon boluntario ta dependé totalmente di personanan i medionan disponibel. Pa por sigui hasi e diferensia den e próksimo sinkuenta añanan, mas ku nunka CITRO tin mester di bo yudansa . Bo tin e pashon pa yuda hende i bo kier forma parti di un tim uní? CITRO semper ta buska hende ku kier duna un man; bishitá nos website na citrocuracao.com

Banda di esei, bo por skohe pa sostené e organisashon finansieramente; kada donashon ta ser invertí direktamente den material i preparashon ku nos boluntarionan tin mester pa por ehekutá nan trabou na un manera sigur i kapas.

Hopi aña mas di CITRO, ku e dedikashon sin interes personal.