WILLEMSTAD- Ultimo dianan tin basta rumor ta kore rondó di e konosido kantante Cizzle ku ta den frònt di e banda O.N.E. i ku e lo no ta forma parti mas di e agrupashon musikal aki. Di akuerdo ku informashon ku nos ta disponé di dje ta indiká ku Cizzle no a bandoná e agrupashon O.N.E. Cizzle a pidi un time out pa e por konsentrá su mes riba algun asuntu personal ku mester di su atenshon. Cizzle ta bai sigui ku e banda pero den forma di “gueststar”. Esaki ta nifiká ku Cizzle lo no tei na tur presentashon di e banda O.N.E.
E konosido kantante kier determiná pasonan firme pa ku su futuro i músika na e momento aki no ta su prioridat number 1. Loke si e kantante tin ta algun plan firme pa aña 2018, kaminda e lo traha riba un solo albùm ku komposishonnan di diferente kompositor lokal. Ya e tin algun kla kaba ku na 2018 e lo graba i lansa riba merkado. Cizzle tei, pero tin momentunan den bida ku mester pone sierto prioridat i na momento ku esakinan ta riba e trayekto korekto e lo ta aktivo manera semper i lo no laga su fanátikonan na kaya.
