CIUDAD DE MEXICO (AFP).- Claudia Sheinbaum, dje partido iskierdista Moreno, a hura dilanti di Kongreso komo e promé presidente femenino di Mexico ku e promesa ku lo respetá libertat i invershonnan privá.
Den e sede parlamentario por a skucha bosnan grita duru “presidenta, presidenta” na momento ku Sheinbaum, di 62 aña, a primintí na respetá e Konstitushon di Mexico i “desempeñá lealtat i patriotismo, mirando pa kosnan bon i prosperidat”.
“Pa promé biaha ta yega na e situashon kaminda un hende muhé ta kondusí destino di nos bunita nashon”, segun e eks alkalde di Ciudad de Mexico (2018-2023), ku a asumí poder den e pais di habla spañó mas poblá di mundu den presensia di hopi dignatario estranhero manera e presidente brasilero, Luis Inacio Lula da Silva, i e promé dama di Merka, Jill Biden.
E seremonia a tuma lugá dilanti di senadornan i diputadonan reuní den seshon di Kongreso kaminda tantu e eks presidente Andrés Manuel López Obrador komo Sheinbaum a risibí un resepshon festivo dje parlamentarionan ofisialista, ku ta kontrolá tur dos kámara.
A destaká e ousensia di rei Felipe VI di Spaña, kende Sheinbaum a rechasá na invitá akusand’é di a nenga na rekonosé daño kousá na e pueblonan mehikano na momento di kolonisashon. Komo forma di protesta Madrid a nenga di manda un representashon.
For di trempan, un multitut a subi kaya pa saludá e mandatario entrante i esun saliente den un rekorido, miéntras ku otronan a reuní den Zócalo (plasa sentral) sperando yegada dje presidente nobo.
Libertatnan
…Presidente nobo di Mexico, Claudia Sheinbaum (meimei) huntu ku presidente saliente Andres Manuel Lopez Obrador i Presidente di Kongreso General di Mexico, Ifigenia Martinez…
“Den nos gobièrnu nos ta garantisá tur e libertatnan. “Esun ku ke bisa ku tin outoritarismo, ta gañando”, segun e flamante mandatario despues di asumí e kargo.
E mandato úniko di seis aña di Sheinbaum, di formashon sientífiko, a kuminsá bou di sombra di un kontroversial reforma di poder hudisial impulsá pa Lopez Obrador pa huesnan keda eligí a base di voto popular, algu úniko den mundu.
Merka, e sosio mas grandi di Mexico, a kritiká e reforma bisando ku e ta representá un “riesgo” i un “menasa” pa e relashon entre e dos paisnan.
Otro reto grandi pa e presidente nobo ta pa enfrentá e violensia relashoná ku narkotráfiko, pa kua a registrá mas di 450.000 asesinato den e pais for di kabamentu di 2006. E presidente nobo a asentuá ku lo no bai den ”guera” kontra di narkotráfiko, sino ku lo e mantené e strategia di Lopez Obrador di kombatí e kousanan mediante programanan sosial pa hóbennan pa evitá ku nan ta keda reklutá pa kriminalnan.
