WILLEMSTAD.–  Kantante Clifton End ta bèk pa deleitá su fanátikonan ku ‘SENSASHON’, un Ritmo Kombiná ku ta primintí pa dominá tur dansflur riba nos islanan. Pa e proyekto aki, Clifton ta kolaborá pa promé biaha ku e talentoso kompositor hóben Miyo Sleur, pa kreá un Ritmo Kombiná outéntiko ku lo pone tur hende riba pia.

E idea pa ‘SENSASHON’ a bin di Miyo Sleur, kende a kana ku e kantika pa algun aña kaba. Ya pa mas ku nuebe aña, Miyo ta un aspirante kompositor ku ta kana ku un maleta yen di kantika. Miyo ta konsiderá Clifton un di su ídolo musikal. Na 2015, Miyo a aserká Clifton pa promé biaha na Central Station di Utrecht, unda el a laga Clifton skucha algun kantika. Clifton tabata impreshoná i mesora a rekonosé e talento di Miyo. Clifton a enkurash’é pa sigui skibí paso e ta bon bezig. “Tambe el a bisa mi pa sigui ku e bon trabou, pero ainda mi mester a sigui krese i madurá artístikamente”, Miyo a splika. Miyo a tuma Clifton su palabranan komo motivashon i a keda kana ku e soño pa komponé un dia p’é. Komo studiante e porta a habri pa Miyo ku banda K’Ribe, ora el a topa e produktor Renan Alberto. Huntu ku K’Ribe, Miyo a produsí algun kantika ku a subi vários lista di hit na radionan di Kòrsou. Algun kantika asta a yega #1 den e tòp listanan di algun emisora, manera ‘Mi Tambe Tin’e’, ‘Drai Bai’, ‘Deep Down’ i asta un tumba na aña 2020. Na 2017, Miyo tabata kana ku un maleta yen di letra ku melodia den su kabes, i tabata sòru di ta bon prepará. Asina el a bolbe dal den Clifton i su mènedjer i kolaboradó Vincent da Silva, ku a rekonosé kon el a krese i madurá artístikamente. P’esei pa Miyo, e kolaborashon ku Clifton riba ‘Sensashon’ tin hopi nifikashon i ta un momento ‘full circle’ p’é. ‘Sensashon’ a keda areglá pa e talentoso músiko Xemio Jacobs, unda Vincent da Silva tambe a agregá algun toke final na e kantika.

Un gira mas ku The Chicago Funk.

Despues ku Clifton a saka ‘Un anochi Nice’ ku Stanley Clementina na mart 2024, Clifton ta hasiendo un tour pa Aruba, Boneiru i Kòrsou na desèmber.  Despues Clifton tin ku regresá Hulanda pa prepará pa algun presentashon na Georgie, Rusia ku The Chicago Funk, e ‘tribute band’ di Earth, Wind & Fire. Fo’i sèptèmber 2023, Clifton ta forma parti di The Chicago Funk, kende ta konosí riba nos isla pa nan presentashon memorabel na Blue Bay. Na 2023, Clifton a kompletá un tour di teater rònt Hulanda i aktualmente nan ta mei mei di nan di dos tour, kual ta bayendo tremendo. The Chicago Funk a sali di tres den un kompetensia di ‘tribute band’ na Hulanda, na e kanal di televishon SBS6. Fuera di Hulanda, The Chicago Funk tabatin tres presentashon na Filipinas, e siudat Flint na Michigan i Suisa. Tambe Clifton i The Chicago Funk tabatin e privilegio di a bai sera konosí ku Earth, Wind & Fire na Las Vegas i asta a kome ku nan.

Ounke e programa di The Chicago Funk ta drùk, Clifton a traha duru pa finalisá e produkshon di ‘SENSASHON, pa su fanátikonan karibense. Ketu bai den tapara ta e produkshon di soul ku nos tur ta pendiente di dje. Pronto Clifton lo lansa e kolaborashon ku Buleria, kual ta e ‘remake’ di ‘It’s All About You,’.

Chèk ‘SENSASHON ‘i riba plataformanan digital i pidi e kantika na bo radio emisora lokal preferí. Pa mas informashon di Clifton End su diferente proyektonan, chèk su página sosial di Facebook @cliftonendmusic i Instagram @cliftonend. Tambe por mail info@buzzbinproductions.com pa presentashon i demas informashon.

LAGA UN KOMENTARIO

Please enter your comment!
Please enter your name here