WILLEMSTAD.- Miéntras ta drenta e temporada di fiesta, Curaçao Medical Center (CMC) ta tuma nota un biaha mas di un oumento di pashèntnan ku ta akudí na emergensia. Esaki ta un tendensia di tur aña. CMC ta apelá na komunidat pa duna prioridat na seguridat pa asina evitá aksidentenan innesesario durante e temporada di fin di aña. CMC ta pidi komunidat asistensia pa redusí e preshon riba rekursonan médiko durante e tempu di fiesta.

Dianan di fiesta ta momentunan di konekshon, alegria, fiesta i union. Sinembargo, oumento den aktividatnan por kondusí na aksidente i leshonnan imprevisto. CMC ke pa tur hende por disfrutá di e aktividatnan na un manera responsabel i tuma prekoushonnan nesesario pa garantisá un temporada di fiesta sigur i salú.

Pa baha e riesgo di aksidente, CMC ta pidi pa tuma nota di lo siguiente:

Disfrutá di aktividatnan ku prekoushon: Partisipá den aktividatnan di fiesta ku prekoushon, spesialmente esnan ku ta envolví klapchi.

Sigui bo skema di remedi: Si bo ta tumando remedi, sòru pa bo ta tuma nan di akuerdo ku lokual ku ta preskribí. Uso di remedi ta esensial pa mantené bo salú durante e temporada di fiesta.

Persona asigná pa kondusí outo: Si alkohòl ta forma parti di bo fiesta, semper tin ku tin un persona asigná òf organisá transporte alternativo pa ta sigur ku tur hende yega kas seif.

Keda alerta: Tantu ora di dekorá, kushiná, òf partisipá den aktividatnan pafó, ta importante pa ta alerta pa evitá aksidente.

Dòkter di kas: Tuma kontakto ku dòkter di kas ku lo referí bo na departamento di emergensia si esaki ta nesesario.

Disfrutá di e temporada di fiesta i krea bunita rekuerdonan ku bo sernan kerí.

LAGA UN KOMENTARIO

Please enter your comment!
Please enter your name here