WILLEMSTAD.-Curacao Medical Center (CMC) den un informe ta mustra riba un situashon bastante alarmante den komunidat. CMC ta indika ku evidensia ta mustra ku e uso di “vape” ta plamando entre hóbennan na Kòrsou. Asta lo tin mucha di ocho aña di edat ta usa “vape”. Rekonosiendo e menasa aki ku ta kresiendo, Curaçao Medical Center (CMC), Ministerio di Salú, Medioambiente i Naturalesa (GMN) i Fundashon Maneho di Adikshon (FMA) a uni forsa den un movementu pa konsientisá, eduká, i protehá hóbennan.
Apesar di su imágen moderno i “trendy” “vape” no ta inosente; e ta dañino. Sigaria elektróniko ta kontené nikotina, metalnan pisá, i kímikonan tóksiko ku por kousa adikshon, daño na pulmon, i malesanan respiratorio a largo plaso. Ekspertonan di salú lokal a konfirmá ku ya tin vários hóben ta risibí tratamentu médiko pa komplikashonnan relashoná ku vaping, hasiendo e kampaña akí no solamente urgente, sino esensial. “Vaping” rápidamente por resultá den adikshon i daño duradero na pulmon. Hóbennan meresé informashon berdadero, i no e mitonan di merkadeo.
Ekspertonan di FMA, CMC, i GMN lo bishitá skolnan rònt Kòrsou pa duna seshonnan edukativo interaktivo. E bishitanan aki ta parti di un programa ku ya ta tumando lugá, pero e luna akí lo enfoká mas riba e tópiko di vaping. E seshonnan lo konta ku visualnan skèrpi, historianan di bida real, i hèrmèntnan práktiko pa yuda hóbennan tuma desishonnan informá i saludabel, i resistí e preshon pa hasi uso di vape.
