Coca-Cola ta organisá un ‘Meet & Greet’ ku Gentz

WILLEMSTAD.- Coca-Cola ta organisá awe, djaluna 17 febrüari, un ‘Meet & Greet’ ku e banda popular Gentz na Sambil.
Entre 5 or di atardi i 7 or di anochi e agrupashon musikal lo ta na e podio prinsipal di Sambil. Kantantenan di Gentz i Rei di Tumba 2020, Raey Lauffer, tambe lo ta presente pa interpretá su tumba ganadó ‘Kòrsou t’ei bula’.
E promé 500 bishitante lo risibí un ‘Gentz Par’é sèrbètè’. Ku e gimmick aki Coca-Cola ta apelá na e ‘hype’ rondó di e ‘kick’ di e banda. Durante nan presentashonnan tur integrante di Gentz ta wòrdu yamá dilanti pa nan waya nan sèrbètè pa e públiko eksitá.
“Gentz i Coca-Cola ta invitá un i tur pa asistí na e evento grátis na Sambil i pa saka nan pòrtrèt ku e banda i ademas pa disfrutá naturalmente di e presentashon musikal i e bòter chikí di Coca-Cola!”, asina Coca-Cola su Gerente di Merkadeo Myrthe George-Verhulst a indiká.
E kolaborashon ta bini di e lansamentu di e bòter mas chikí di Coca-Cola di 12oz. Pa enfoká e introdukshon den e periodo di karnaval e kompania di refresko a uni forsa ku Gentz. Pa e okashon aki e banda a graba un jingle i un videoclip.
E bòter nobo di 12oz ta optenibel den e tres sabor: Coca-Cola Original Taste, Coca-Cola No Sugar i Sprite. E atkisishon nobo aki na e portafolio di refresko ta hasié mas fásil pa e konsumidó por manehá su konsumo di kaloria.
E introdukshon di e bòter chikí ta parti di e vishon di Coca-Cola pa sigui ekspandé e variashon di bibidanan. E strategia aki ta sigui e desaroyo bou di konsumidó ku a transformá mundialmente. E konsumidó kier mas sabor i mas opshon di bebida  i un empake mas chikí. Ku esaki na mente, Coca-Cola Curaçao ta ofresé awor un bebida i un empake pa kada nesesidat i antoho.

SHARE

LEAVE A REPLY