WILLEMSTAD.-Presidente di Parlamento sra. Charetti America-Francisca a habri aña parlamentario 2021 – 2022 un ratu despues ku su ekselensia gobernador di Kòrsou sra. Lucille George-Wout a trese intenshon i plannan di gobièrnu pa e aña parlamentario ku ta kuminsá awe. Un di e puntonan hopi importante ku a bini dilanti ta e lei di Reino den desaroyo COHO.

Su ekselensia gobernador a para ketu pa yama danki na enfermeranan, médikonan, esnan den transporte publiko, kuerpo polisial i tur otro persona i funshon ku ta hasi tur esfuerso posibel pa evitá plamamentu di e vírus Corona. Tambe el a indiká ku gobièrnu ta gradesido na tur partner den Reino ku a duna nan parti den e lucha kontra di e pandemia aki. Den e aña parlamentario aki Kòrsou lo sigui estrechá lasonan ku partnernan reino, kaminda ta posibel nos mes lo enfrentá e retonan pero ta nifiká tambe ku lo pidi yudansa kaminda esei ta nesesario.

Gobernador a bisa tambe ku un pasá a hasi un bon inisio ora ku a logra un akuerdo atministrativo di COHO, esei ta djis un inisio. Mester kana un kaminda pasobra COHO lo sirbi pa yuda implementá esaki. Mester hasi lo maksimo pa logra implementashon di un plan nashonal di rekuperashon. A yega momentu tambe pa un kambio di mentalidat, no tin espasio pa mas desperdisio. Ta nos tur mester traha pa oumentá produkshon.

Gabinete Pisas II a bai di akuerdo kon ta atendé ku COHO, pero ainda Parlamento por hasi pregunta riba COHO. Mas aleu gobernador ta indiká ku gobièrnu ke stimulá ku pueblo ta bai bakuna di forma masal. Tambe mas pronto posibel pèrkurá pa refineria i COT por bira operashonal atrobe. Importante ta ku e refineria na Kòrsou a haña un balor stratégiko for di momentu ku a deskubrí gran kantidat di petroli na Sürnam i Guyana. Pais ta den krísis, pues no ta ora pa diskutí subida di gastu di niun índole. Lesa tur detaye di e reunion importante aki den edishon di EXTRA.

LAGA UN KOMENTARIO

Please enter your comment!
Please enter your name here