BOGOTA, AP.- Outoridat kolombiano a saka 59 siudadano venezolano involukrá den e protestanan antigubernamental ku a laga tres morto i diferente herido.
Migrashon Colombia a informá den un komunikado ku a tuma e medida aki despues di “algun rapòrt ku outoridat a entregá. E estranheronan aki ta realisando un serie di aktividat ku por pone òrdu públiko i seguridat nashonal di Colombia na riesgo”.
E direktor general di Migrashon, Christian Kruger a señalá ku “nos no ta laga ningun siudadano estranhero afektá nos trankilidat”.
Polis metropolitano di Bogotá a sostené traslado di e venezolanonan pa un aeropuerto militar kaminda nan a subi un avion di Forsa Aéreo kolombiano. E avion a transportá nan pa Puerto Inirida. Desde aki, un barku di Armada kolombiano lo transportá nan pa e siudat venezolano San Fernando de Atabapo kaminda nan ta keda entregá na outoridat di e pais.
E pueblo kolombiano a protestá pa asesinato di mas di 100 liber sosial den áreanan rural desde ku e gobièrnu di Duque ta na mando di e pais. Algun ta eksihí pa implementá mehorashon den e akuerdo di pas firmá na 2016 ku FARC.
Kruger a informá den un rueda di prensa ku a saka un total di 61 estranhero, di kual 60 ta venezolano i un peruano. El a indiká ku e personanan ekspulsá aki no por drenta Colombia durante e próksimo dies añanan sin un visa i si e migrantenan drenta ilegal, e pais lo kondená nan.
