BOGOTA, AP.- Polis kolombiano ku yudansa di forsanan di México, Costa Rica i El Salvador a konfiská mas di kuater tòn di kokaina den tres operashon den awanan internashonal i a detené 8 persona asina a keda informá.
E promé akshon a tuma lugá entre djaluna i djamars ora dos ‘go fast’ ku tabata transportá kasi 3 tòn di kokaina a keda interseptá sùit ost di Colombia den awanan internashonal. Den un operashon a kapturá dos mèksikano i 3 ekuatoriano.
Den e di dos konfiskashon a hasi uso di yudansa di outoridatnan di Costa Rica ora a interseptá un ‘go fast’ na 20 mia di e pais i ku tabata hiba 756 kilo di kokaina, i a detené dos kolombiano i un ekuatoriano.
Den e di tres operashon realisá na 754 kilometer di kosta di El Salvador ku apoyo di forsa naval di e pais aki a konfiská 382 kilo di kokaina. No a duna mas detaye di e akshon ei.
E ‘go fast’ nan a sali for di e siudat kolombiano Nariño ku destino pa Sentro Amérika i Merka i a kuminsá un investigashon den kordinashon ku otro paisnan pa averiguá e ret internashonal di narkotráfiko na kende e droga tabata pertenesé.
