BOGOTA, COLOMBIA.- Colombia, konsiderá komo e produktor di mas grandi kokaina a pone un rèkòrt aña pasá pa prosesamentu i produkshon di e droga aki i tambe pa kultivo di e blachi di koka for di kual e ta ser trahá, esei di akuerdo ku Nashonnan Uní. Kultivo di blachi di koka tabata 13 porshento mas haltu aña pasá kompará ku 2021, miéntras ku produkshon di kokaina a subi di 1.400 tòn te na 1.738 tòn, di akuerdo ku e Ofisina riba Droga i Krímen di Nashonnan Uní. Esaki ta e sifranan di mas haltu ku UN a registrá for di tempu ku el a kuminsá monitòr e aktividatnan aki na 2001. Mayoria di e kokaina produsí na Colombia ta destiná pa Merka i Europa.

Produkshon di blachinan di koka aktualmente ta kubriendo un 230.000 hèktar di e pais. Kasi dos tersera parti di e matanan di koka ta ser kultivá den e parti sùit di Narino i Putumayo, ku ta na frontera ku Ecuador, ku na su turno mes ta konfrontando problema serio ku violensia entre gèngnan den trafikashon i tambe den e parti nort di Santander na e frontera ku Venezuela. Por bisa ku mas ku mitar di e plantashonnan di mata di koka ta bini di reservanan indígena, reservanan den mondi i parkenan natural. E sifranan nobo ariba menshoná a sali publiká un dia despues ku e presidente di Colombia Gustavo Petro i su kolega mehikano Andres Manuel Lopez Obrador a kritiká e supuesto ‘guera kontra droga’ enkabesá pa Merka. Nan ta konsiderá ku e kampaña aki solamente a benefisiá kartelnan di droga, fomentá violensia i sin atendé ku e kousa mes.

LAGA UN KOMENTARIO

Please enter your comment!
Please enter your name here