“CHIQUITO MALO”
BOGOTA (AFP).- Gobièrnu di Colombia a suspendé e desishon di kaptura di “Chiquito Malo”, hefe di e kartel di narkotráfiko mas grandi dje pais i di otro 28 miembro dje organisashon. E desishon akí, ta apesar ku Colombia a komprometé ku Merka pa hasi su persekushon mas severo, di akuerdo ku un dokumento ofisial publiká ayera.
“Chiquito Malo” ta lider dje poderoso Clan del Golfo, konsiderá terorista di parti di Washington, ku for di sèptèmber di aña pasá ta negoshá ponementu abou di arma a kambio di benefisionan penal. E diálogonan ta forma parti dje polítika agonisante di pas di e iskierdista Gustavo Petro, ku ta purba yega na un akuerdo ku e gruponan prinsipal armá dje pais promé ku e bandoná presidensia den ougùstùs benidero.
Den un dokumento fechá 29 di aprel, e konsehero prinsipal di pas Otty Patiño a pidi ministerio públiko e suspenshon dje órdennan di kaptura na fabor di Jobanis de Jesus Avil, nòmber real di Chiquito Malo, i otro miembronan dje grupo. E intenshon ta pa nan por drenta un zona di nortwèst dje pais designá pa gobièrnu, pa por sigui ku negosiashonnan di pas, di akuerdo ku un komunikado dje ofisina di Alto Komisionado di Pas.
E abogado dje grupo kriminal a bisa na final di aprel di ta mira komo “imposibel” pa logra un akuerdo di pas promé ku fin dje mandato di Petro dia 7 di ougùstùs.
Den febrüari último, Petro a akordá ku e presidente norteamerikano, Donald Trump, pa dòbel e persekushon di e hefenan prinsipal narko kolombiano, entre nan Chiquito Malo. El a hasi esaki durante di un bishita na White House ku a pone fin na lunanan di tenshon diplomátiko entre e aliadonan históriko.
