Un bista aéreo ta mustra trahadónan di reskate buskando sobrebibientenan ku tabata den un edifisio na Pereira, Colombia, ku a basha den otro durante dje temblor.
PEREIRA, Colombia (AFP).- Colombia ayera a kuminsá un fase nobo buskando algun shen hende pèrdí bou di sobrá di apartamentonan, ofisinanan i hospitalnan destruí durante dje fuerte temblor, esaki na momento ku chèns pa haña sobrebibientenan a bira ménos.
Trahadónan di reskate i boluntarionan a kompletá nan di kuater dia di trabou riba serunan di ruina, ku e speransa di logra algun reskate milagroso dje tragedia ku te ku ayera a laga 287 morto.
E temblor di magnitut 7.4 a bati poblashonnan di Pasífiko i den region ‘cafetera’, den wèst dje pais, kaminda outoridatnan ta buskando 379 persona di kua nan paradero ta deskonosí.
Armá ku hèlm i un lantèrno, Hernan Giraldo ta kere ku su yu hòmber ta bibu bou di loke a sobra di un hotèl di Pereira, un dje siudatnan mas afektá. Juan Felipe Giraldo, di 24 aña, tin un sita pa kasa djadumingu awor.
“Si e sali ku bida, e kasamentu lo tuma lugá despues. Importante pa e ta bibu, ku e sali triunfante”, segun e hòmber di 43 aña, kende ta bisa ku den su kurason e ta karga speransa.
Makinarianan pisá na vários punto dje pais ta kita sobrá di edifisionan na lugánan kaminda ta deskartá ku por tin sobrebibiente. Den algun zona tin holó di morto.
Un boluntario ta pidi pèrmit pa drenta un área ku a sufri hopi daño di Pereira pa e usa mikrofonnan spesial entre murayanan. Tin speransa “si nan permití nos drenta, i si e hendenan keda totalmente ketu, pa hinka e mikrofonnan i bisa na posibel víktimanan pa duna algun señal di bida, ku gòlpinan, raspa algu, grita”, segun Nestor Velez.
Den Cali, e siudat ku mas morto, algun dje kasnan funerario a keda destruí i komo tal mester a hiba e kurpanan na Palmeira, 30 kilometer mas leu.
Miéntras tantu, Banko Mundial ayera a anunsiá di a pone 200 mion dòler disponibel komo yudansa di emergensia. Tambe a kuminsá ku un estudio pa determiná e kosto dje temblor.
