BOGOTA, AP.- Fiskal kolombiano a informá djaluna di a presentá un akusashon kontra e hefenan di gueria Ehérsito Liberashon Nashonal pa e sekuestro di vários periodista den diferente parti di e pais.
“E echonan investigá tabata relashoná ku e sekuestro di vários periodista i robo di nan ekiponan tékniko, miéntras nan tabata laborá den region di Catatumbo, 21 di mei 2016. Akinan e periodista kolombiano spañó Hernandez Mora a wòrdu sekuestrá. Asina Ministerio Públiko a bisa den un komunikado.
E integrantenan di e grupo rebelde a wòrdu akusá pa rebelion i sekuestro.
Segun fiskal, Hernandez Mora tabata realisando un investigashon riba eliminashon di kultivo ilegal i a wòrdu gañá pa dos integrante di ELN.
Dia 23 di mei 2016, e periodista Diego Alonso D’ Pablos i su kamarógrafo, Carlos Alberto Calderon, a yega Catatumbo pa kubri e sekuestro di Hernandez Mora. Di mesun forma, nan ekiponan di trabou a wòrdu hòrtá i nan tabata den poder di ELN durante kuater dia.
Un aña despues, 21 di mei 2017, e periodistanan ulandes Derk Johannes Bolt i Eugenio Marie Follonier a wòrdu sekuestrá den un zona rural na Nort di Santander.
Un di e akusadonan, Israel Ramirez Pineda alias “Pablo Beltran” ta e hefe di negoshadónan di ELN pa un akuerdo di pas ku gobièrnu.
Desde aña pasá, e gueria ta teniendo kombersashonnan di pas ku e gobièrnu kolombiano, ounke e partinan no por a yega na un akuerdo di tregua. Dia 14 di ougùstùs, e mandatario Ivan Duque a señalá ku lo duna un tempu límite di 30 dia pa evaluá e kombersashonnan.
