CARACAS, VENEZUELA (AFP).- Gobièrnu di Colombia i di Segunda Marquetalia, un dje disidentenan di gueria di FARC, ayera a kuminsá na Caracas ku e promé buèlta di negosiashonnan di pas, un inisiativa dje presidente iskierdista Gustavo Petro.
Shete delegado di gobièrnu i otro shete dje organisashon rebelde ku na kabes e eks number dos dje grupo gueria ya no eksistente, Ivan Marques, ta partisipá den e promé proseso ku lo sigui te ku djasabra.
“Awe nos ke manifestá ku Segunda Marquetalia Ejercito Bolivariano, bou di mi mando i e grupo kolektivo, tin tur disposishon pa kontribuí pa logra pas pa Colombia”, segun Marquez a ekspresá durante dje akto.
E negosiashonnan aki ta generá resistensia ya ku nan ta tuma lugá ku esnan ku a bira lomba pa e akuerdo di pas ku Fuerzas Armadas Revolucionarias de Colombia (FARC) di 2016, tempu ku Marquez tabata e hòmber mas importante dje organisashon i e hefe negoshadó.
E partidonan a ekspresá ku den e promé fase lo definí protokòl di negoshashon i lo anunsiá e promé desishonnan.
Marquez, kende su nòmber berdadero ta Luciano Marín, a duna di konosé na Caracas ku su regreso na e grupo armá tabata debí na “inkumplimentu i traishon dje Estado di Akuerdo di pas di La Habana”.
“Nos no por start for di sero”, segun reakshon dje hefe di delegashon di gobièrnu, armando Noboa, apesar di konsiderá ku tabatin “implementashon no korekto” dje akuerdo.
E lider gueriero a permanesé algun aña den e proseso despues dje akuerdo ku a konkluí ku e gueria birando un partido polítiko. Pero el a desertá den 2019 i a reaparesé den un video anunsiando un grupo nobo armá.
La Segunda Marquetalia tin alrededor di 1.600 kombatiente, segun kálkulonan di inteligensia militar. Analistanan ta konsiderá ku e ta un gueria débil den komparashon ku EMC ku na kabes alias Ivan Mordisco, un dje hefenan ku no a firma e pas den 2016, i ku Ejército de Liberación Nacional.
Walter Mendoza, hefe dje delegashon insurgente, a bisa ku Segunda Marquetalia ta aspirá pa “e posibilidat di sigui hasi polítika sin arma. “Kumpli ku loke keda akordá lo ta e kondishon”, segun el a agregá.”
