Representantenan di Clan del Golfo, Luis Armando Perez Castaneda (r) i e negoshadó representante di gobièrnu kolombiano Alvaro Jimenez ta interkambiá di dokumento durante seremonia ayera pa firma un “Akuerdo di Pas den Doha”.
DOHA, Qatar (AFP).- Gobièrnu kolombiano i e Grupo di Golfo, e mayor grupo di narkotráfiko dje pais, ayera a akordá na Qatar pa sigui ku e kombersashonnan ku meta pa un posibel desarme dje grupo paramilitar i e pasifikashon di e teritorionan ku nan ta kontrolá. E Grupo di Golfo ta un organisashon narkotrafikante di orígen paramilitar outodenominá komo “Ehercito Gaitanista de Colombia” (EGC), responsabel di mandamentu di algun shen ton di kokaina tur aña pa Merka i Europa for di Colombia, segun inteligensia militar dje pais latinoamerikano.
E grupo di 7.500 miembro a representá un dje prinsipal desafionan den área di seguridat ku e gobièrnu iskierdista kolombiano ta enfrentando. Tur dos parti a kuminsá un proseso di diálogo pa alkansá e desmobilisashon a kambio di benefisionan hudisial i garantianan di seguridat.
For di despues di a start su mandato den 2022, e presidente kolombiano Gustavo Petro a purba na negoshá e ponementu abou di arma dje diferente gruponan ku ta sigui operá den e pais despues dje históriko akuerdo di pas ku e eks-gueria di FARC den 2016. “Clan del Golfo” ta konsiderá su mes komo un grupo polítiko i ta reklamá pa risibí un trato similar na esun di gueria i e paramilitarnan.
“Colombia ta eligié pa diálogo di pas i ta gradisí tur e nashonal ku ta kompañá nos riba e kaminda aki”, segun e representantenan di gobièrnu Agueda Gomez promé ku el a firma. E akuerdo, yamá “”Kompromiso di Pas den Doha”, a konta ku mediashon di Qatar, Noruega, Suisa i Spaña.
E mediadónan a splika ku e kompromiso ta konta ku dos parti: e promé ta e relashon ku produkshon di droga i e reklutamentu di adolesentenan i muchanan di parti di Clan del Golfo den 15 teritorio. E di dos ta buska pa reintegrá e muchanan sòldá den sosiedat.
“E deklarashon aki ta representá un paso dilanti pa yega na ponementu abou di arma i konstrukshon di pas”, segun e hefe negoshadó na Qatar, Mohamed Al Julafi.
