BOGOTA (AFP).- Presidente di Colombia, Gustavo Petro, a anunsiá dil òf firma un ”akuerdo di intenshon” pa ingreso dje pais na e akuerdo ekonómiko i komersial ku China, konosí komo “Ruta di Seda” (nòmber usá for di siglo XIX relashoná ku un ekstenso ruta komersial di China).
Ruta di Seda ta kontemplá e finansiamentu di proyektonan di infrastruktura ku fondonan chines pa impulsá e komersio i konektividat den Asia, Europa, Afrika i Amérika Latina.
“Nos ta bai papia ku Xi Jinping (presidente di China) kara-kara, no na rudia”, segun Petro, ku ainda no a konfirmá e fecha dje bishita.
Den 2023 e mandatario kolombiano a biaha pa Beijing pa negoshá akuerdonan komersial ku e gobièrnu chines, pero segun el a bisa ayera, e biaha’ki e ta bai pa firma e akuerdo.
“Mi ta bai pa firma e Ruta di Seda. “E próksimo gobièrnunan lo sigui traha riba dje”, segun el a bisa.
Mas ku shen pais a firma e akuerdo, ku ta un proyekto emblemátiko dje gobièrnu di Xi Jingping lansá den 2013.
Den febrüari último, e presidente panameño, José Raúl Mulino, a anunsiá kanselashon dje akuerdo ekonómiko ku China despues di preshon dje mandatario norteamerikano Donald Trump pa redusí e influensia di Beijing riba kanal di Panama.
E anunsio di Petro ta bini na momentu ku tin tenshon entre Colombia i Merka, pa desakuerdonan riba deportashon di kolombianonan.
Gremionan kolombiano a manifestá nan preokupashon pa posibel represaya di Merka, prinsipal sosio komersial di Colombia.
