Trahadónan di reskate di Colombia i Israel durante di trabounan ku mashinnan pisá pa kita e loke a sobra di algun edifisio ku a basha den otro.
BOGOTA (AFP).- E temblor potente na Colombia ku a destruí parti wèst dje pais i a mata algun shen persona a laga pèrdidanan ekonómiko ekivalente na 9.570 mion dòler, segun un kálkulo preliminar dje presidente Abelardo de la Espriella.
E temblor di magnitut 7.4 a tumba míles di kas, edifisionan haltu, skol- i hòspitalnan, prinsipalmente den e siudatnan di Pasífiko i dje region ‘cafetera’, den wèst.
Segun e mandatario, un kompania privá a hasi un kálkulo dje pèrdidanan konsentrá riba un tersera parti dje pais. E temblor a laga 304 morto i 4.548 herido, segun e balansa mas resien.
“Imaginá bosnan mes e dimenshon dje desaster. Ta un sifra preliminar ku lo bai na ahustá segun ku nos tin mas informashon”, De la Espriella a bisa.
Despues dje tragedia, Colombia a risibí yudansa mionario for di paisnan manera Merka i organisashonnan, e.o. Banko Mundial.
De la Espriella den fin di siman a hasi un apelashon riba Washington pa suspenshon temporal di pagonan ku Colombia mester hasi pa asina aliviá e ekonomia nashonal, solisitut ku el a ripití ayera. Tambe el a bisa ku e Minister di Komèrsio, Mauricio Gomez, lo biaha pa Washington pa hasi e negoshashon pa esaki.
Na kabamentu di yüli, e belasting riba produktonan kolombiano a oumentá di 10% pa 12.5%, ku eksepshon di kòfi i petroli.
Un siman despues dje temblor di 10 di ougùstùs, Colombia a drenta den e etapa pa hasi limpiesa ku probabilidat chikí di por reskatá sobrebibientenan. E kantidat di esnan pèrdí a subi te na 426.
