E prizòn kolombiano “Renacer”, na Sabanas de San Angel, Magdalena. E ta un prizòn mega spesialmente pa e kriminalnan mas peligroso di Colombia.
BOGOTA, Colombia (AFP).- Colombia pronto lo konta ku un mega prizòn pa kriminalnan mas peligroso dje pais, na estilo dje mandatario salvadoreño Nayib Bukele. E presidente derechista, Abelardo de la Espriella, na poder for di ougùstùs, ke konstruí dies mega prizòn den diferente zona dje pais durante su mandato di kuater aña.
E prizòn, yamá Renacer, ta situá “meimei di nada” den Magdalena (nort), leu for di laman Karibe, i lo tin kapasidat pa 1.974 prezu kendenan lo ta totalmente aislá, segun un fuente di Unidat di Servisionan Penitensiario di Colombia. Su konstrukshon a kuminsá durante e gobièrnu di èks-presidente Ivan Duque (2018-2022), pero a keda paralisá debí na falta di fondo.
De la Espriella ta hiba un guera total kontra di mafianan poderoso dje pais, na kendenan el a ofresé “prizòn òf graf”. E deseo ta pa e prizòn lo no tin akseso na señal di telefòn ni internèt i ku e ta keda kustodiá pa un divishon spesial di ehérsito.
Mi ke “pa ni e señalnan di Krus Santu” yega serka nan , segun e derechista a bisa den kampaña. E kosto dje mega prizòn ta kore den kareda di 291.000 mion peso kolombiano (komo US$ 87 mion).
Potrètnan ku a keda publiká ta mustra áreanan enorme paresido na e prizòn salvadoreño, CECOT, ku tin un espasio di 22 hèktar, tambe sèlnan ku kamanan chikitu, pegá na bañonan.
E modelo di prizòn di Bukele, kritiká pa organisashonnan di derechinan humano reklamando pa dignidat di prezunan, tambe a gosa di sosten di lidernan derechista dje region manera Daniel Noboa den Ecuador i Keiko Fujimori na Perú.
Den ougùstùs último, De la Esriella tambe a pidi pa sera prezunan mas peligroso riba barkunan meimei di laman, un proyekto ku ta na enkargo di armada kolombiano.
