BOGOTA, AP.- Presidente Ivan Duque a reiterá ku miéntras Ehérsito di Liberashon Nashonal (ELN) no mustra boluntat di pas i sigui atentá kontra e infrastruktura di petroli den e pais i e kolombianonan, lo no tene ningun diálogo. E mandatario tabata enfátiko durante un kombersashon na Bogotá.

Duque a señalá ku despues di a okupá e puesto komo presidente el a tuma 30 dia pa evaluá kon e kombersashon ku delegadonan di su antesesor, Juan Manuel Santos a bai ku e grupo kriminal. El a splika ku durante e 17 lunanan di aserkamentu tabatin 400 atentado, mas di 100 asesinato, diferente sekuestro i ku esaki “no ta ilustrá un aktitut di pas”.

El a sigurá ku pa negoshá ELN mester liberá tur persona sekuestrá i para tur aktividat kriminal. Interpol a pidi ekstradishon di e hefenan prinsipal di ELN pa rebelion i asesinato.

ELN a ataka diferente base militar i e infrastruktura di petroli durante e último lunanan ku a pasa. E oleodukto Caño Limon Coveñas a sufri 26 atentado te ainda. Diferente militar i polis a muri den kombatenan ku ELN. E kontakto pa un diálogo di pas entre ELN i e gobièrnu di Duque ta kongelá debí na atakenan kontinuo di e gueria.

 

LAGA UN KOMENTARIO

Please enter your comment!
Please enter your name here