Ganadó di premio Nobel di Pas, e venezolano Maria Corina Machado (58 aña), huntu ku Kristian Berg Harpviken, Sekretario di Komishon Nobel di Noruega, durante di konferensia di prensa na Grand Hotel na Oslo.
BOGOTA (AFP).- Colombia no ta deskartá di duna asilo na presidente venezolano Nicolás Maduro si esaki bai di akuerdo pa baha meimei di preshonnan di Merka, segun e kansier kolombiano. E presidente di Colombia, e iskierdista Gustavo Petro, a boga pa un transishon demokrátiko na Caracas, meimei di tenshonnan entre Maduro i e mandatario norteamerikano Donald Trump.
Kansier di Colombia, Rosa Villavicencio, a manifestá ku su pais lo por duna asilo na e presidente venezolano den kaso ku yega na un akuerdo ku Washington. “Si e salida ei ta nifiká ku e mester biba den un otro pais òf pidi protekshon, Colombia lo no tin motibu pa nenga esei”, segun e diplomatiko den un entrevista na radio.
Petro ayera a sigurá ku “ta momentu pa un amnistia general i di un gobièrnu di transishon” na Venezuela. Villavicencio ta insistí ku lo ta “un solushon pa e situashon”ku e region ta biba den kuadro dje presensia militar di Merka den Karibe pa kombatí narkotráfiko. Maduro ta denunsiá ku e strategia ei tin komo meta pa tumba su gobièrnu.
“Pero esei ta un desishon ku mester keda tumá pa Merka i e gobiernu di Maduro den un negoshashon”, segun e kansier. Ounke el a ofresé e asilo, Villavicencion ta sigurá ku Maduro kisas ta preferá pa skohe un lugá “mas alehá i mas trankil” pa biba den kaso ku e bandoná Caracas. E posishon di Petro, aliado di Maduro i krítiko di Trump, ta koinsidí ku e entrega na Oslo dje Nobel di Paz na e lider opositor venezolano Maria Corina Machado.
Den novèmber e kansier Villavicencio a bisa na prensa ku Maduro tabata “dispuesto na aseptá un transishon” despues di a logra un akuerdo den kua ta stipulá ku lo e no kai será. Despues el a splika ku su palabranan a keda malinterpretá.
Colombia no ta rekonosé e elekshonnan di 2024 den kua Maduro a keda eligí pa un di tres periodo, pero ta mantené relashonnan diplomatiko ku Venezuela.
