Fumigashon riba áreanan grandi di kultivo di mata di koka.
BOGOTA, Colombia (AFP).- E gobièrnu derechista nobo di Colombia a eliminá un resolushon di 2015 ku ta prohibí fumigashon aéreo ku e herbisida (produkto pa mata yerba) glifosato debí na su potensial daño na salú humano i e ekosistema. Na poder for di 7 di ougùstùs último, e presidente Abelardo de la Espriella ta planiá pa imponé un liña duru pa enfrentá e mafianan di narkotráfiko i esaki ku apoyo di Merka.
Mediante un resolushon di 18 di ougùstùs ku a bira konosí ayera, e mandatario aliado di Donald Trump a laga sin efekto e prohibishon pa spùit aéreo ku glifosato riba kultivonan di blachi di koka den Colombia, e pais ku mayor produkshon di kokaina na mundu.
E dokumentu ta atvertí ku e kambio den lei “no ta impliká e reanudashon outomátiko” dje práktika dor di avionetanan, pero ta habri kaminda pa gobièrnu por bolbe fumigá basta ku por minimalisá e efektonan atverso. Colombia a stòp ku e tipo di buelonan di fumigashon den 2015 pa desishon dje presidente dje tempu ei i ganadó di premio Nobel di Pas Juan Manuel Santos.
Den tempu di negosiashonnan di pas ku e gueria FARC e tempu ei, e èks-mandatario a duna oido na un atvertensia di Organisashn Mundial di Salú ku a klasifiká glifosato komo “posiblemente” kanseroso.
E fumigashonnan e tempu ei a keda rechasá di parti di kampesinonan kendenan ta bisa ku esaki tin impakto negativo riba nan kultivonan tradishonal i fuentenan i awa.
